Монгол улсын барилгын материалын 80 орчим хувийг урд хөрш хангадаг. Харин энэ их хэмжээний бараа материалыг тээвэрлэх хүндхэн үүрэг Улаанбаатар Төмөр Замынханд ногддог бөгөөд Замын-Үүд дэх Шилжүүлэн ачих ангийнхан бараа материалын ачилт, тээврийн гол ажлыг нугалдаг юм билээ.

 

      Энэхүү анги нь 1, 2, 3-р талбай гэсэн үндсэн 3 хэсгээс бүрддэг.

•      1-р талбай нь 1995 онд УБТЗ-ын хөрөнгө оруулалтаар БНХАУ-аас вагон болон автомашинаар орж ирж байгаа ачааг вагонд шилжүүлэн ачих зорилгоор байгуулагджээ.

•      2-р талбай нь 1996 онд Япон улсын Засгийн газрын буцалтгүй тусламжийн хөрөнгө оруулалтаар баригдсан бөгөөд чингэлэг, нарийн царигаар ирсэн битүү вагонтой ачааг шилжүүлэн ачдаг байна.

•      3-р талбай нь 2008 онд УБТЗ-ын хөрөнгө оруулалтаар баригдсан  байна. Энэ талбайд БНХАУ-аас автомашинаар  орж ирж байгаа цемент болон бусад ачааг вагонд шилжүүлэн ачдаг.

 

 

              Шилжүүлэн ачих анги нь Хятадын төмөр замаас ирж байгаа ачааг гар аргаар болон өргөх зөөх механизм ашиглан дотоод, гадаад вагонуудад шилжүүлэн ачих, талбай болон агуулахад буулгаж хадгалах, олгох, мөн БНХАУ-аас автомашинаар тээвэрлэгдэн ирж буй импортын ачааг орон нутгийн тээвэрт хүлээн авах, ачих, буулгах, олгох, ачааны дагалдах тээврийн бичиг баримтыг бүрдүүлэх, тооцоо хийх, тайлан гаргах, пүүлэх зэрэг үйл ажиллагааг 24 цаг тасралтгүй нэг цэгээс гүйцэтгэдэг байна. Энэхүү ангийн 1-р талай нь хоногт 119 вагон, 2-р талбай нь хоногт 131 вагон, 3-р талбай нь хоногт 17О вагон ачаа ачих хүчин чадалтай бөгөөд хоногт нийтдээ 420 вагон ачаа ачих боломжтой гэнэ.

 

 

          Тус ангийн дарга Л.Баасандорж ярихдаа: - “Манай Шилжүүлэн ачих анги нь нийтдээ 370 ажилтны бүрэлдэхүүнтэй үйл ажиллагаа явуулдгаас дийлэнхи нь буюу 75.1 хувь нь 35 хүртэлх насны залуучууд байдаг. Бид энэ залуучуудын хүчээр хилээр орж ирж байгаа бүх төрлийн бараа материалыг ямар ч нөхцөлд цаг алдахгүй ачиж шилжүүлэх ажлыг зохион байгуулж чаддаг. Жилээс жилд цемент зэрэг барилгын материалын импортын хэмжээ өсөн нэмэгдэж байгаа учраас бид ч бас хүчин чадлаа нэмэгдүүлэх арга хэмжээ авч байгаа. Зөвхөн цемент л гэхэд хоногт дунджаар 63 вагон ачиж байна. Цементийн энэ их урсгалыг дагаад хил дээрх ачаа зөөврийн машины 90 хувь нь цемент ачдаг.

 

 

Барилгын улирал эхэлмэгц эдгээр цемент ачдаг машинууд үнээ нэмдэг, гэтэл өөр төрлийн ачаа зөөдөг машинууд хүртэл дагаад үнээ нэмдэг тал бий. Иймээс бид энэ явдлыг аль болох гаргуулахгүй байх үүднээс ачилт тээврийн ажлыг хурдан шуурхай болгох ажлыг зохион байгуулж байна. Харин энэ ажил зөвхөн биднээс шалтгаалахгүй, нөгөө талд ачаа илгээгч, хил гааль гээд олон хүчин зүйл байгаа тул бүгдээрээ хамтраад тал талаасаа хичээж ажиллая” гэсэн юм.