Гэр хорооллын дахин төлөвлөлтөнд төсөл хэрэгжүүлэгчдээр урьдчилсан байдлаар 18 компани шалгарч, өөрсдийн үйл ажиллагаа, санхүүгийн чадамж, өмнө нь хийсэн бүтээн байгуулалт, одоо тус байршил дээр байгуулах барилга байгууламжийнхаа ажлыг танилцуулж байгаа билээ. 

 

     Дахин төлөвлөлтийн ажлыг удаашруулахгүй, эрчимтэй явуулахын тулд тухайн дүүрэг хорооны иргэдээс гадна хороодын засаг дарга, хэсгийн ахлагч нар чухал үүрэг гүйцэтгэнэ. Тиймээс дахин төлөвлөлт хийгдэх дүүрэг хорооны засаг дарга, хэсгийн ахлагч нарыг хүлээн авч уулзлаа.

 

   Уулзалтаар гэр хорооллын хөгжлийн дарга Ш.Ганхуяг, Орон сууцжуулах төсөл ОНӨҮГ-ын дарга Л.Лхагвадорж нар гэр хорооллын дахин төлөвлөлтийн үйл ажиллагааны журмыг танилцууллаа. Дахин төлөвлөлтийн үйл ажиллагааны журмын дагуу шалгарсан компаниуд иргэдээс санал авах ажлыг зохион байгуулж байгаа бөгөөд дүүрэг хороо тус бүрт ажиллах хүмүүсийг томилсон байна. Тухайн компани дэмжигдэх үү, үгүй юу гэдэг нь иргэдийн санал асуулгаар тодорхой болсны дараа  30 хоногийн хугацаанд иргэн тус бүртэй  уулзаж гэрээ хийх юм.  Иргэдээс 4-р сарын 06-ны өдөр санал авах ажлыг ямар зохион байгуулалттайгаар хийхийг энэ уулзалтын үеэр ярилцлаа.

 

    Мөн санал авах хэсгийн хорооны хүмүүсийн нэрсийг тодорхой болгож, санал авах байр, саналын хуудас зэрэг шаардлагатай зүйлсийг бэлтгэх асуудлуудаар тодорхой ойлголт өглөө. Дахин төлөвлөлтийн гүйцэтгэлийг хийх компаниудад тухайн байршил дээрх газар, үл хөдлөх хөрөнгийн өмчлөгч, эзэмшигч нарын нэрсийг Улсын бүртгэлийн ерөнхий газраас гаргаж өгөх асуудлыг ГХОСТ-өөс хариуцахыг энэ үеэр мэдэгдлээ.