Зэвсэгт хүчний “Алдар” спорт хорооны шинэ цогцолборын шав тавих ёслол өчигдөр болж өнгөрлөө. 

Ёслолын арга хэмжээ “Алдар” спорт хорооны талбайд, шинийн 24-ний бэлэгт сайн өдөр болсон юм. Ёслолын арга хэмжээнд Монгол Улсын Их хурлын гишүүн, Засгийн газрын гишүүн, Батлан хамгаалахын сайд Д.Бат-Эрдэнэ, БХЯ-ны төрийн нарийн бичгийн дарга, бригадын генерал З.Болдбаатар, Зэвсэгт хүчний жанжин штабын дарга Ц.Бямбажав, МУГТ Д.Баттулга болон албаны бусад хүмүүс оролцсон. 

Батлан хамгаалахын сайд Д.Бат-Эрдэнэ: Шинэ спорт цогцолбороос үе, үеийн аваргууд төрөн гарна гэдэгт итгэж байна 

-Засгийн газрын ээлжит хуралдаанаар “Монгол цэрэг бүтээн байгуулалтад” хөтөлбөрийг баталсан. Хөтөлбөрийг хэрэгжүүлэх үйл ажиллагааны төлөвлөгөөг боловсруулан баталж, хэрэгжилтийн явц, үр дүнг Засгийн газарт танилцуулж байхыг надад үүрэг болгосон. Манай улсад ажиллах хүчин дутагдалтай, тэдгээрийн мэргэшсэн байдал хангалтгүй, сахилга, зохион байгуулалт сул, хөдөлмөрийн бүтээмж доогуур гэсэн үндэслэлээр стратегийн ач холбогдол бүхий ашигт малтмалын орд газруудад гадаадын ажиллах хүчнийг татан оролцуулж байгаа нь иргэдийг ажилтай, орлоготой байлгах төрийн бодлого, үндэсний аюулгүй байдалд сөргөөр нөлөөлж байна. 

Тиймээс ч энэ хөтөлбөрийг хэрэгжүүлснээр үндэсний аюулгүй байдлыг хангах, хөгжлийн зорилтуудыг хэрэгжүүлэх, ажиллах хүчний төлөвшилд дэмжлэг үзүүлэх, нийгэмд эерэг нөлөөлөл бий болгох зэрэг ач холбогдолтой гэж үзэж байгаа. Энэ хөтөлбөрийн хүрээнд ханш нээх улирал эхэлж буй бэлэгт сайн өдөр шинэ спорт цогцолборынхоо шавыг тавьсандаа баяртай байна. Бид ирэх оны өдийд шинэ спорт цогцолборынхоо нээлтийг хийхээр төлөвлөсөн. Тиймээс ч хамгийн орчин үеийн техник, хэрэгсэл, тоног төхөөрөмжөөр тоноглогдсон шинэ спорт цогцолбороос үе, үеийн тив дэлхий, олимпын аваргууд төрөн гарна гэдэгт найдаж байна. “Алдар” спорт хорооноос төрөн гарсан үе, үеийн аваргуудын буухиа үргэлжилж, медалийн өнгөө хувиргаж, тоог нь нэмнэ гэдэгт итгэлтэй байгаа. 

БХЯ-ны Төрийн нарийн бичгийн дарга, бригадын генерал З.Болдбаатар: Ирэх оны хавар гэхэд бид шинэ цогцолбороо ашиглалтад оруулна 

-Засгийн газраас баталсан хөтөлбөрийн хүрээнд өнөөдөр /өчигдөр/ шинэ спорт цогцолборын шавыг тавилаа. Харин ирэх жилийн өдийд гэхэд бид шинэ спорт цогцолбороо ашиглалтад оруулчихсан, тамирчид маань бэлтгэлээ базааж байх биз ээ. Зэвсэгт хүчний “Алдар” спорт хорооноос олон алдартай тамирчин төрсөн. Цаашид ч энэ буухиа тасрахгүй үргэлжилнэ гэдэгт итгэлтэй байна. 

 

МУГТ, Д.Баттулга: Шилдэг тамирчдын “гэр” болсон “Алдар” спорт хороо шинэ цогцолбортой боллоо 

-Олон арван шилдэг тамирчдын “гэр” болсон “Алдар” спорт хороо шинэ цогцолбортой болж байгаад баяртай байна. Учир нь би өөрөө тамирчин хүн. Миний хувьд 140 гаруй тамирчинтай энэ спорт хорооноос гараагаа эхэлж байсан. Тамирчдын хувьд бэлтгэл сургуулилтаа хийх, шинэ тоног, төхөөрөмжтэй спорт цогцолбор маш чухал. Бэлтгэл, заал, тамирчин гурав салшгүй ойлголт. Тиймээс ч тамирчин хүний хоёр дахь гэр нь болсон спорт цогцолбор байгуулагдаж байгаад сэтгэл хангалуун байна. 

“Алдар” спорт хорооны дарга, Монгол Улсын даян аварга Г.Өсөхбаяр: Тамирчид маань бэлтгэл сургуулилтаа сайн хийгээрэй 

-Миний хувьд “Алдар” спорт хороонд дасгалжуулагчаар ажиллаж байсан. Тэгээд Зэвсэгт хүчний жанжин штабын даргын тушаалаар “Алдар” спорт хорооны даргаар томилогдоод ажиллаж байна. Тус спорт цогцолборын хувьд улсын төсвийн хөрөнгөөр баригдах юм. Нийтдээ 6.6 тэрбум төгрөгийн хөрөнгө төсөвлөгдсөн. Ирэх оны хавар гэхэд шинэ спорт цогцолбор маань ашиглалтад орно. Тиймээс тамирчдын маань хувьд бэлтгэл, сургуулилтаа сайн хийж, амжилт гаргах л үлдлээ.

Х.Өнөр