“Тээвэрлэлтийг хурдасгая 2013” зөвлөгөөн болж байна
Өнөөдөр Дорноговь аймгийн Замын-Үүд хилийн өртөөнд Улаанбаатар Төмөр Зам болон УБТЗ-аар үйлчлүүлэгч байгууллагуудын хамтарсан “Тээвэрлэлтийг хурдасгая 2013” зөвлөгөөн болж байна. Энэхүү зөвлөгөөн нь төмөр замын ачаа тээврийн хугацааг богиносгох, ачаа эргэлтийн үед гардаг зарим хүндрэлүүдийг хэлэлцэж шийдвэрлэх зорилгоор УБТЗ-аас жил бүр уламжлал болгон зохион байгуулдаг.
Энэхүү зөвлөгөөнд БХБЯ, Зам тээврийн яам, Монгол банк, Гаалийн Ерөнхий газар болон мэргэжлийн ТББ, барилгын материал импортлогч хувь хүн, аж ахуйн нэгжийн төлөөлөл оролцож санал хүсэлтээ солилцож байна. Зөвлөгөөнийг УБТЗ-ын Ачаа тээврийн албаны дарга Б.Энхбаяр нээж, үргэлжлүүлээд УБТЗ-ын Хөдөлгөөн зохион байгуулалтын албаны дарга П.Батхуяг, Шилжүүлэн ачих ангийн дарга Л.Баасандорж, Замын-Үүд өртөөний дарга О.Мэндсайхан нар ачаа тээвэрлэлтийн өнөөгийн байдал, УБТЗ-ын ачаа тээврийн хүчин чадал, тээвэрлэлтийн зардал, гарч байгаа хүндрэлийн талаар танилцуулга хийлээ.
УБТЗ-ын Ачаа тээврийн албаны дарга Б.Энхбаяр хэлэхдээ жил ирэх тусам барилгын материал, тэр дундаа цементийн импортын хэмжээ нэмэгдэж байгааг онцлоод, 2013 оны энэ үед 145.000 тн цемент тээвэрлэсэн бол энэ тоо өнгөрөгч оны мөн үеэс 19 хувиар өссөн үзүүлэлттэй байна. Энэ онд нийтдээ 2 сая орчим тн цемент тээвэрлэнэ гэж тооцож байгаа гэлээ.
УБТЗ-ын Хөдөлгөөн зохион байгуулалтын албаны дарга П.Батхуяг хэлэхдээ, өнгөрсөн онд УБТЗ түүхэндээ анх удаа 20 сая тн ачаа тээвэрлэлт хийсэн, энэ жил зөвхөн арматур гэхэд 160.000 тн-ыг тээвэрлэхээр тооцож байна гэлээ.
Шилжүүлэн ачих ангийн дарга Л.Баасандорж хэлэхдээ, төмөр замаар тээвэрлэж байгаа бүх ачааны 50 хувийг машин механизмаар, үлдсэн хувийг гар аргаар ачдаг гээд, цемент, шилэн хийц, цагаан тоосго зэрэг хэврэг ачааг ачихад баглаа боодлын хувьд шаардлага хангадаггүй бэрхшээлтэй байдаг. Зориулалтын баглаа боодолтой орж ирвэл хугацаа богиносч, ачих үйл ажиллагаа ч хялбар болох боломжтойг импортлогчдод санууллаа.
Зөвлөгөөн төмөр замаар үйлчлүүлэгч байгууллага, аж ахуйн нэгжүүдийн санал хүсэлт, Төрийн байгууллагуудын харилцан асуулт хариултаар үргэлжилж байна.