Барилгын талбай дээр гарсан осол эндэгдэл Улаанбаатар хот ч гэхгүй хөдөө орон нутагт жил ирэх бүр нэмэгдэх болсон. Үүний нэг тодхон жишээ өнгөрсөн оны наймдугаар сард Орхон аймгийн бүсийн оношлогоо шинжилгээний төвийн байрны өргөтгөлд ажиллаж байсан 13 настай хүү шороонд даруулан нас барсан хэрэг гарчээ.

 

      Уг хэргийн талаар талийгаач хүүгийн эцэг эх хэвлэлийнхэнд хандлаа.  Талийгаач хүүгийн ээж С.Дуламрагчаа нь “Агни трейд” ХХК-д тогооч ажилтай бөгөөд тус компанийн хөдөлмөр хамгааллын инженер н.Ганбаттай тохиролцож 13 настай 2 хүүгээ барилгын туслах ажилд оруулжээ.

 

      Гэтэл 8-р сарын 11-ний өдөр траншейнд тогтсон үерийн усыг зайлуулж байх үеэр хоёр хүүхэд шороонд даруулж, Д нь 9 хоногт эмнэлэгт эмчилгээ хийлгэсэн боловч бие нь сайжралгүй байсаар амиа алджээ. 

 

      Талийгаач хүүгийн эцэг эхийн хэлж байгаагаар тухайн үед тус компанийн ажилчид болох таван хүн подвалд архи ууж байсан учраас ямар нэгэн туслалцаа авч чадаагүй учраас хүү нь эндсэн гэнэ. Гэтэл хэрэг гарсаны дараа “Агни трейд” компаниас Орхон аймгийн телевизээр хүүг маань ээжийгээ дагаж ирээд тоглож байхдаа шороонд даруулсан гэсэн захиалгат нэвтрүүлэг хийлгэн, хэл амаар доромжилж албан ёсоор уучлалт гуйгаагүй талаар хүүгийн эцэг эх хэлсэн юм.

 

      Уг хэргийг Орхон аймгийн сум дундын шүүх хянан хэлэлцсэн бөгөөд “Агни трейд” ХХК-ийн хөдөлмөр хамгааллын инженер н.Ганбатад дөрвөн жилийн тэнсэн харгалзах ял оноожээ.  Харин талийгаач хүүгийн эцэг эх энэхүү шийдвэрийг шударга бус гэж үзэж буй бөгөөд давж заалдаад байгаа аж.

Хүүгийн ар гэрийнхний нэхэмжилснээр “Агни трейд” ХХК –иас оршуулгын зардал болгож 10238000 /арван сая хоёр зуун гучин найман мянга/ төгрөгийг өгсөн гэнэ.

 

       Энэ хэргийн талаар “Агни трейд” ХХК-ны өмгөөлөгчөөс тодруулахад насанд хүрээгүй хүн туслах ажилтнаар ажиллаж байсан нь үнэн. Харин тухайн үед үндсэн ажилчид нь согтуу байсан гэдгийг гэрчлэх гэрч байхгүй. Телевизээр тийм нэвтрүүлэг үзээгүй гэсэн хариул өглөө.