Нийслэлийн ИТХ-ын Тэргүүлэгчдийн хурал болж, Улаанбаатар хотын өвөлжилтийн бэлтгэл ажлын явцын тухай хэлэлцлээ. Хуралд өвөлжилтийн бэлтгэл ажлыг хариуцдаг салбар, байгууллагуудын удирдлага, дүүргүүдийн Засаг дарга нар оролцож, хийж буй ажлуудынхаа явцаас тэргүүлэгчдэд танилцуулсан юм.
           
ЗАА-ны Инженерийн байгууламжийн хэлтсийн мэдээгээр нийслэлийн агаарын бохирдлыг бууруулах ажлын хүрээнд хийж буй УС-15 орчмын халаалтын зуухнуудыг зогсоож, халаалтын нэгдсэн сүлжээнд холбох ажил 75 хувьтай, Дэнжийн 1000 орчмынх 45 хувьтай байна. Шугам сүлжээ солих зурваст орсон айл өрх, албан байгууллагууд хашаагаа  чөлөөлж өгөхгүй байгаа зарим нэр тохиолдлыг эс тооцвол ажил хэвийн үргэлжилж, тогтоосон хугацаандаа хүлээлгэж өгөх боломжтой гэдгийг инженерүүд хэлж байв.
           
Орон сууцны удирдах газрынхны мэдээллээр орон сууцны хорооллын доторх шугам сүлжээний засвар шинэчлэлийн ажил амжилттай хийгдэж байгаа, ус, дулаан дамжуулахтай холбоотой асуудал гарахгүй гэдгийг хэллээ. Гэхдээ айл өрхүүдийн дотор шугам сүлжээг угааж цэвэрлэх ажил хүндрэл учруулдаг бөгөөд одоогоор 62 айлын шугам сүлжээг засварласан байна. Сууц өмчлөгчдийн холбоодын дээд зөвлөлийнхний мэдээллээр Улаанбаатар хотын хэмжээнд нийт 840 гаруй орон сууцны лифтийг шинэчлэхээр төлөвлөснөөс 440 гаруй лифтийг шинэчлэн дуусчээ. Сонгуультай холбоотойгоор цахилгааны холбогдолтой урсгал засварыг зогсоож, цахилгааны засварын ажил хойшлогдсон хэдий ч одоо хэвийн үргэлжилж байгааг холбогдох албаныхан хэллээ.
           
Нийслэлийн ИТХ-ын дарга Д.Баттулга хангалтгүй гүйцэтгэлтэй байгаа ажил, шийдэхэд хүндрэлтэй байгаа асуудлуудыг дахин боловсруулж, дахин танилцуулахыг холбогдох байгууллагуудад даалгалаа.

Б.БӨРТЭ /info.mn/