Шороо манаргасан уулын энгэрт эко хавтан суулгаж, ногоон хүрмээр гоёсон байна. Энэ бол бидний сайн мэдэх Тасганы овоо. Овооны оройд байдаг айлууд уулаа тойрон нөгөө талаас нь мацан байж гэрийн бараа  хардаг сан.  Ямартаа л хүмүүс энэ овоон дээрх айлууд хашаанаасаа гарвал л уулын уруу өнхөрлөө гэж тохуурхдаг байсан. Одоо энэ цаг ард хоцорч Тасганы овоо руу  зүлэг, бутан дундуурх хээн угалзтай шатаар өгсдөг болжээ. Хот тохижилтын газраас энэ бүгдийг хийж, тохижуулж дууссан байна. Тодруулбал, Овооны энгэр хэсэгт эко хавтан суурилуулж, зүлэгжүүлэн, овооны урд талын 1.2 км явган хүний зам тавьсанд тэр хавийн иргэд онц дүн өгсөн байна.

Мөн энэ ажлын талаар Хот тохижилтын газрын орлогч дарга н.Сумжав “Өнөөдөр овооны тохижилтын ажил дуусч байна. Бид хийж гүйцэтгэхээр төлөвлөсөн ажлаа 100 хувь биелүүлсэн” гэж тодорхойлсон юм.  

Өнгөрсөн тавдугаар сарын эхэн үеэс эхэлсэн тохижилтын ажил сонгуулийн өдрүүдэд хэсэг хугацаанд завсарласан ч бүх зүйл төлөвлөгөөний дагуу явж ирэх даваа гаригт захиалагч талд хүлээлгэн өгөх боломжтой болжээ.

Тасганы овооны тохижилтын ажлыг тендерт шалгарсан зургаан компани хийж гүйцэтгэсэн бөгөөд нийслэлээс энэ ажилд зориулан 400 орчим сая төгрөг төсөвлөсөн аж. Овооны энгэр хэсэгт эко хавтан суурилуулж ногоон байгууламж байгуулсан, явган хүний зам тавьсан, үерийн ус зайлуулах шуудуу, зам хоорондын зүлэгжилт зэрэг ажлуудыг хийсэн байна. Тодруулбал, “Дэлгэрэх бумба” ХК үер усны шуудуу болон шат хийх ажлыг хариуцан хийсэн. Мөн “Экологийн дулаан хаус” ХК явган хүний замын хавтанг нийлүүлж “Нөхөд” ХК нийлүүлсэн хавтанг нь суурилуулсан. Харин овооны энгэрт байгаа эко хавтанг “Хүслийн шонхор” ХК хийж өгсөн гээд хамтын хүчээр уг ажлыг гүйцэтгэжээ. Ийнхүү Тасганы овооны шороонд дарагдаж, утаанд будантсан энгэр өнгөө сольж өрхөө татсан гэр мэт гэгээтэй болсон байлаа. 

Уг нь тус овоон дээрхи айлуудын хашааг нэгэн жигд болгосноор өнгө үзэмж нь сайжрах хэдий ч тухайн хашаанууд нь хувийн эзэмшилд хамаарах тул хот тохижилтын газрынхан янзалж болохгүй байгаа гэнэ.

Хот тохижилтын газар энэ жил Нарны замын дундах ногоон байгууламж болон Тасганы овооны тохижилтын ажлыг хариуцан гүйцэтгэсэн байна. Мөн тун удахгүй Цагаан давааны хогийн цэгт оффисын барилга, граж барих ажлыг эхлүүлэхээр болжээ.  

Д.ЖАРГАЛ /news.mn/