Зуны гурван сардаа багтааж бүтээн байгуулалтаа амжуулахаар нилээд хэд хэдэн замыг хаагаад байгаа. “Сэлбэ”-ийн гүүрийг засах зорилгоор замын нэг урсгалыг хаагаад гурван долоо хонож байгаа хэдий ч засварын ажил төдийлөн урагштай биш байна.

Хэрвээ та хажуугаар нь өнгөрөхдөө анзаарсан бол тус засварын ажилыг гүйцэтгэж буй ажилчидын тоо арав хүрэхгүй байгааг олж харсан байх. Зуун айлын зам бол нийслэлийн хамгийн ачаалалтай замуудын нэг. Учир нь тэнд төвлөрсөн барилгын зах, иргэний бүртгэл мэдээллийн төв гээд иргэдийн олноор үйлчлүүлдэг газарууд байдаг. Засаж янзалж шинэчлэлгүй л яахав гэхдээ иргэдэд бага төвөг удах хэрэгтэй.

Ийнхүү удаашралтай явагдаж буй засварын ажлаас болж, түгжрэл үүсээд зогсохгүй машинууд шүргэлцэх нь ихсээд байгаа юм. Өдөрт яг энэ зам дээр 3-4 машин шүргэлцэж, дуут дохиогоо асаасан түргэний машин эмнэлэгрүүгээ орохын тулд хагас цаг зогсож байна. Хэрвээ иймэрхүү байдлаас шалтгаалж хүний амь эрсдэх юм бол хэн хариуцлагыг нь хүлээх вэ? Засварын ажлыг яст мэлхийн хурдаар гүйцэтгэж байгаа “Motor service” кампани уу эсвэл даалгавар өгөөд таг чиг болсон “Нийслэлийн авто замын газар” уу?

Нэгэнт л хөрөнгө мөнгө зарж, тендер зарлан байж хийлгэж байгаа юм чинь гүйцэтгэгч компаниас чанар, хурд,үзэмж гурвыг цогцоор нь шаардах хэрэгтэй.

Гадны орнуудын зам засварын ажил хийгдэж байгаа үгүй нь анзаарагддаггүй. Учир нь тэд замын хөдөлгөөн багатай шөнийн цагаар маш хурдан хугацаанд хүн хүчээр зодож чанартай гүйцэтгэдэг гэнэ. Манай улс яагаад энэ жишгийг дагаж болохгүй гэж. Яагаад заавал бид өвөл зунгүй түгжирч, утаа униарандаа бухимдаж байх ёстой юм бэ? Энэ тал дээр холбогдох албаны хүмүүс анхаарлаа хандуулж нэгийг бодож хоёрыг тунгаах цаг хэдийннэ болжээ.
 

/chuhal.mn/