Энэ онд нийслэлд долоон нүхэн гарц барих сураг сонсогдсон. Тунельд баригдах шинэ нүхэн гарцын ажлаас болоод нийслэлийн нэлээд тооны иргэд өглөө, оройгүй замын түгжрэлд бухимдаж байна. Иймээс иргэдийг бухимдалд хүргээд байгаа Тунелийн нүхэн гарц барих ажлын нөхцөл байдлыг Нийслэлийн авто замын газрын Зам барилга хяналтын хэлтсийн инженер Ч.Батсайханаас тодрууллаа.

-Сансрын тунельд барьж буй нүхэн гарцын ажил хэр явж байна вэ?
-Нүхэн гарцын ажилд цаг агаарын байдал хүндрэл учруулж, хүлээлгэн өгөх хугацаанаасаа хоцорч байна. Уг нь төлөвлөгөөний дагуу ажиллаж байгаа. Гэхдээ ажлаа хугацаанд нь хүлээлгэн өгөхийн тулд илүү цагаар ч гэсэн ажиллах болно. Өнөөдрийн хувьд цахилгааны кабель шилжүүлэх ажил эхлэх юм. Энэ ажил дуусмагц бетон цутгаж угсралтын ажлаа хийнэ.

-Энэ жил нийслэлд хэчнээн нүхэн гарц барих вэ?
-Долоон нүхэн гарц барих зураг төсөл гарсан боловч төсөв мөнгө хүрэлцээгүй учраас баригдах боломжгүй болсон. Тиймээс энэ жилдээ ганцхан тунелийн нүхэн гарцыг л улсын хөрөнгөөр барьж дуусгана.

-Хэдий хэмжээний хөрөнгөөр барьж байна. Хэдэн сард ашиглалтад орох вэ?
-Нэг тэрбум 320 сая төгрөгт багтаан барина. Эхний ээлжинд авто машины хөдөлгөөнийг нээхээр ажил­лах бөгөөд тус нүхэн гарц бүрэн хэмжээнд ашиглалтад орох хугацааг аравдугаар сарын 1-ний өдөр гэж төлөвлөсөн.

-Шинээр баригдаж байгаа болон баригдсан нүхэн гарцыг арчилж, нөхөн сэргээхийг ямар байгууллага хариуцдаг вэ?
-Манайх Улаанбаатар зам засвар арчлалтын компанид хүлээлгэн өгдөг. Тиймээс нийслэл дэх нүхэн гарцын ашиглалтын үйл ажил­лагааг Улаанбаатар зам засвар арчлалтын компани хариуцах ёстой. Үүнээс үзэхэд нийслэлчүүдийг бухимдуулсан замын түгжрэл ирэх аравдугаар cap хүртэл үргэлжлэх бололтой. Сансрын тунелийн нүхэн гарцыг “Хотын зам” компани хийж байгаа гэсэн юм. Дээрх “Хотын зам” ХХК багшийн дээдийн автобусны буудлын нүхэн гарцыг ч 2009 онд барьж таван жилийн баталгаа өгч байжээ. Гэтэл нөгөө нүхэн гарц нь гурван жилийнхээ босго дээр дээвэр нь хагарч эвдрээд удаж байна.

Дээрх нүхэн гарцын санхүүжилтэд улсын хөрөнгөөс 560 гаруй сая төгрөг гаргасан аж. Харин энэ удаад сансрын тунелийн нүхэн гарцад үүнээс хоёр дахин их буюу тэрбум 320 сая мөнгийг улсаас төсөвлөсөн юм. Харин Багшийн дээд дэх автобусны буудлын нүхэн гарцын эвдэрсэн дээврийг хэзээ засах вэ гэсэн асуултад Улаанбаатар зам засвар арчлалт компанийн Ерөнхий инженер Т.Янжиндулам “Дээврийг нөхөх материалыг гаднаас захиалж авчирдаг. Ирэхээр нь засах болно” гэхээс өөр тодорхой зүйл хэлсэнгүй.

Г.Нямсүрэн /olloo.mn/