Улсаас санхүүжилт гаргахгүйгээр иргэд олон нийтийн оролцоотойгоор авто зогсоол болон давхар гарааш барих “Гарааш” арга хэмжээний талаар Газрын менежмент төлөвлөлтийн хэрэгжилтийг хариуцсан мэргэжилтэн Б.Нямдаваагаас тодрууллаа.

-Хэчнээн байршилд давхар гарааш болон авто зогсоол барих вэ ?
-Манай улсын хувьд тулгамдсан асуудлуудын нэг нь авто замын түгжрэл болон авто зогсоол хүрэлцээгүй байгаа явдал. Тиймээс Нийслэлийн Засаг дарга болон Нийслэлийн газрын албанаас санаачлан өнгөрсөн оноос эхэлж Улаанбаатар хотын хэмжээнд нийт 30 байршилд давхар гарааш, 19 байршилд авто зогсоолыг иргэдийн оролцоотойгоор барих шийдвэр гаргасан. Уг шийдвэрийг хэрэгжүүлэх үүднээс тухайн байршлуудад төсөл сонгон шалгаруулсан.

-Нийт хэдэн компани сонгон шалгаруулалтад оролцсон юм. Сонгон шалгаруулалтад явагдаж дууссан уу?
-Нийт 20 компани төсөлд оролцсоноос “Эм Жэй Бридж” ХХК, “Урбан-Инфра энд парк” ХХК “Чандмань ананд” ХХК, “Саруул сайхан” ХХК, “Алтанговь” ХХК болон “МПЭ” ХХК гэсэн долоон компани шалгарсан. Харин дараагийн шатны төсөл бидэнд мөн ирсэн байгаа Долоон байршилд нийт 15 компани өрсөлдөж байна. Одоогоор шалгаруулалт дуусаагүй байна.

-Уг төслийн хамгийн гол ач холбогдол нь юу вэ? Ямар нөхцөлтэй шалгаруулалт явагдаж байна?
-Уг төслийн гол ач холбогдол нь улсаас хөрөнгө гаргахгүй, зөвхөн иргэд болон аж ахуйн нэгжүүдийн оролцоотойгоор баригдах нөхцөлтэй юм.

-Дээрх зогсоол болон гараашуудыг яг хаана хаана хийхээр төлөвлөж байгаа бэ?
-Давхар гарааш болон зогсоолуудыг Баянгол дүүргийн наймдугаар хорооны орон сууцны долдугаар байрны зүүн талд 0.24 га газар, мөн тус дүүргийн зургадугаар хороонд байрлах 98-р дугаар цэцэрлэгийн баруун талд, Баянзүрх дүүргийн гаалийн нэгдүгээр байрны хойд талд, тус дүүргийн 16-р дугаар хороонд 74-р дүгээр байрны хойд талд Сүхбаатар дүүргийн гуравдугаар хорооны оронд 19-р дүгээр байрны урд, Хан-Уул дүүргийн нэгдүгээр хороонд 39-р дүгээр байрны хойд талд, Сонгинохайрхан дүүргийн 13-р дугаар хороонд наймдугаар байрны хойд талын хүүхдийн тоглоомын талбайн доор зэрэг байршлуудад төлөвлөгдөөд байгаа.

-Иргэд төслийг хэрхэн хүлээж авч, дэмжин оролцож байна вэ?
-Иргэд оршин суугчдын хувьд нэг хэсэг нь дэмжиж байгаа ч зарим нь дэмжихгүй тал бий. Тухайлбал, сүүлийн үед гараашийн зориулалтаар газар аваад хувийн барилга байгууламж барих явдал ихэссэн. Энэ нь иргэдийн итгэл алдарч, эсэргүүцэх байдалд хүргэж байна. Мөн зарим нэг Сууц өмчлөгчдийн хороод ашгийн бус байгууллага хэдий ч хувийн эрх ашгийг бодож байгаа. Учир нь гадны байгууллагуудад газраа өгөхгүй, өөрсдөө оршин суугчидтай хамтран хөрөнгө үүсгэн барилга барина гэсэн хандлагатай байгаа. Гэхдээ энэ тал дээр манай газрын алба хамтран ажиллаж чадаж байгаа.

-Нийслэлийн хэмжээнд хэчнээн тооны давхар гарааш, авто зогсоол шаардлагатай байдаг юм вэ?
-Нийслэлийн хэмжээнд авто зогсоол болон давхар гарааш барих хэрэгцээг тооцоолж гаргах, хангах боломжгүй юм. Одоо бид зөвхөн өөрсдөө хүсэлт гаргасан хувь хүн, аж ахуйн нэгжтэй төслийнхөө хүрээнд хамтран ажиллах боломжтой.

-Нэг давхар гарааш, авто зогсоол барихад ойролцоогоор хэдий хэмжээний хөрөнгө шаардагдаж байгаа вэ?
-Үүнийг одоогоор шууд тодорхой хэлэх боломжгүй. Учир нь тендерт шалгарсан компаниуд эхлээд ажлын зураг төслөө бэлэн болгосны дараа газраа авч, төсвөө тодорхойлно. Зарим газруудад одоо байгаа дан гараашийг буулгаж, дээд давхарт нь хүүхдийн тоглоомын талбайтай, доор нь авто зогсоол барина. Хэрэв дан зогсоол барих бол байгууллагын байрлал болон өндрөөс шалтгаална. Мөн чөлөөт талбайг харгалзан хэдэн давхар гарааш барихаа шийднэ. Хамрах хүрээний хувьд харьцангуй өөр байгаа тул төсөвлөгдөх хөрөнгө ч гэсэн харилцан адилгүй байна. Энэ төслөөс үүдэн цаашдаа шинээр баригдах хувийн хэвшлийн орон сууц болон үйлдвэр үйлчилгээний байгууллагуудыг гарааштай байх шаардлага гарч байна.

М.Жаргал/olloo.mn/