Их сургуулиудын хотхон байгуулах ажлын захиргааг хоёр жилийн өмнө Засгийн газар баталсан. Энэ ажлын явцын талаар Үндэсний хөгжил, шинэтгэлийн хороо, БСШУЯ-ны Их сургуулиудын хотхоны ашиглалтын өмнөх захиргаанаас өчигдөр мэдээлэл хийлээ. Хотхоныг 2010-2021 онд багтаан үе шаттайгаар таван газарт барьж, байгуулах бөгөөд бүтээн байгуулалтад нийт 20 их наяд төгрөг шаардлагатай аж. Багануур дүүргийн IV, V хорооны нутаг дэвсгэрийн 20 мянган га газарт оюутны хотхон, Орхон аймгийн төвд Геолог, уул уурхайн их сургуулийн Дорнод, Ховдын дээд сургуулиудыг зүүн болон баруун бүсийн Сургалт, эрдэм шинжилгээ, үйлдвэрлэл, бизнесийн төв болгон хөгжүүлэх, ДарханУул аймгийн төвд техникийн чиглэлийн төв барих юм. Их сургуулиудын хотхоны ашиглалтын өмнөх захиргаа өнгөрсөн хугацаанд Багануур дүүргийн IV, V хо рооны нутаг дэвсгэрт баригдах хотхоны газарт байрлал зүйн зураг, урьдчилсан ерөнхий төлөвлөгөө, инженер-геологийн дүгнэлт, судалгаа хийжээ. Одоо байгаль орчны нарийвчилсан үнэлгээ, техник эдийн засгийн үндэслэл болон ерөнхий төлөвлөгөө боловсруулах ажил эрчимтэй явагдаж байна. ҮХШХ-ныхон “Монгол Улсын 2013-2017 оны хөрөнгө оруулалтын хөтөлбөр”-т дээрх хотхоныг барьж байгуулахад зориулан, улсын төсөв, хувийн хөрөнгө оруулалтын нийт 1.3 их наяд төгрөгийн хөрөнгө тусгасан хэмээв. Их сургуулиудын хотхоны ашиглалтын өмнөх захиргааны дарга Ц.Энхболд “Багануур дүүрэгт баригдах хотхонд МУИС, ШУТИС, МУБИС, ЭМШУИС, СУИС-ийн нэг, хоёрдугаар дамжааны оюутнууд байрлана. Төгсөх курс болон магистр, докторын зэргийн оюутнууд Улаанбаатар хотын харьяа сургуульдаа суралцана. Ингэснээр хотын хүн амын ачаалал багасах юм. Ирэх жил гэхэд цахилгаан хангамж, дэд бүтэц, холбоо харилцааны ажлуудыг гүйцэтгэж дуусгана. Мөн орон сууц, сургуулийн байр барина. Тиймээс ШУТИС-ийн Барилгын инженер, архитектур, Мэ дээлэл, холбооны технологийн сургуулийн оюутнууд ирэх жилээс эхний ээлжинд суралцах боломжтой. Оюутнууд тус хотхоны бүтээн байгуулалтад оролцонгоо суралцана” гэв. /mongolnews.mn/