Энэ жил зам засварын ажил харьцангуй удаашралтай байна гэх шүүмжлэл гарч байгаа. Бороо элбэг байгаагаас гадна санхүүжилт байхгүйгээс томоохон автозамын засвар шинэчлэлтийн ажил төлөвлөгөөний дагуу явж чадаааүй аж. Зам засварын ажлын явцын талаар Автозамын газрын хэвлэл мэдээллийн ажилтан Д.Оюунгэрэлээс зарим зүйлийг тодрууллаа.

-Өнөөдрийн байдлаар аль замууд хаалттай байна вэ?

-Сансарын туннелийн зүүн урд уулзвар хаалттай байна. Есдүгээр сарын 1-нд нээгдэнэ. Зуун айлын Сэлбийн голын урд гүүрийг хаасан. Есдүгээр сарын 7-нд нээнэ. Сүхбаатарын гудамжны 260 метр замын ажил үргэлжилж байгаа бөгөөд өнөөдрөөс энэ замыг үргэлжлүүлэн урд талын уулзварыг нь нэмж хааж байна.

Өөрөөр хэлбэл, МУИС-аас Самбуугийн гудамж руу ордог уулзварыг хаана гэсэн үг. Мөн 32-ын тойрог Хайлаастын уулзвараас Долоон буудлын эцэс хүртэлх 19 км замын хөдөлгөөнийг хааж байна. Төлөвлөгөөгөөр энэ сарын 16-нд ашиглалтад орно. Мөн Тээврийн товчооноос хойшоо Үндсэн хуулийн гудамж хүртэлх 300 метр зам хаалттай байна. Энд шугам сүлжээний ажил хийгдэж байгаа.

-Ойрын хугацаанд нэмж хаах замууд байна уу?

-Сүхбаатарын гудамж нийтдээ хоёр километр. Одоогийн засвартай байгаа замаас хойшоо хэсэгчилж хаагаад явна. Зуун айлын хос гүүрийг өнөө жил засахаар болсон. Одоогоор урд гүүрийн засварын ажил үргэлжилж байгаа бол хойд гүүрийг нь энэ сарын 27-нд хаах юм. Энхтайвны өргөн чөлөөний баруун хэсэгт 3.2 км зам, зүүн хэсэгт 4.5 км замын засварын ажил эхэлнэ.

-Зүүн дөрвөн замын уулзвараас зүүн тийшээ Офицеруудын ордон хүртэлх зам явахын аргагүй эвдэрч түгжрэл ихээр үүсч байна. Энхтайвны өргөн чөлөөний эдгээр замыг хэзээ засч эхлэх бол?

-Зүүн дөрвөн замаас зүүн тийшээ Амгалан хүртэлх 4.5 км замыг "Ялгуусан" компани гүйцэтгэхээр гэрээ байгуулсан. Хэзээнээс хэсэгчилж хаахыг Замын цагдаагийн газар, Нийслэлийн нийтийн тээврийн газартай хэлэлцэж тохирсны дараа тодорхой болно.

Мөн Энхтайвны өргөн чөлөөний баруун хэсэг буюу нэгдүгээр хороолол хүртэлх замыг хааж засна. Эдгээр ажлуудыг он дамжин хийгдэнэ. 2013 оны наймдугаар сард дуусна.

-Тэгвэл энэ жил хаанаас хаа хүртэлх замыг нь засах юм бол?

-Гэрээнд заасны дагуу ажиллах байх даа.

-Өнөө жилийн зам засварын ажил удааширч байна гэсэн шүүмжлэл гарч байна. Нийт замын засварын ажил хэзээ дуусах төлөвлөгөөтэй байна вэ?

-Улирлын чанартай ажил учраас гэрээ ёсоор ихэнх замын ажил аравдугаар сарын 31, арваннэгдүгээр сарын 1 гэхэд ашиглалтад өгөх ёстой байгаа. Харин орон сууцны хороолол доторх замуудыг наймдугаар сарын 15 гэхэд гүйцэтгэж дуусна. Энэ ажил одоогоор 95 хувийн гүйцэтгэлтэй явж байна.

-22 товчооны зам засварын явцын тухайд?

-22 товчооны замын хувьд одоогийн байдлаар далан дүүргэлтийн ажил үргэлжилж байна. Аравдугаар сарын 31-нд ашиглалтад орно.

-Томоохон замуудаас ашиглалтад өгсөн үү?

-Шинэ замын тухайд "Хүчит шонхор" захын уулзвараас Далан давхарын уулзвар хүртэлх замыг ашиглалтад өгсөн. Баруун нарангийн үерийн далан буюу 22 товчооны наана шинэ гүүр барьж байна. Энэ гүүрийн ажил 90 хувийн гүйцэтгэлтэй явж байгаа бөгөөд одоо хучилтаа хийх дутуу. Энгельсийн гудамжны гүүр буюу Нарны гүүрэн гарцын урд байрлах гүүрэн гарцын хучилтын ажил хийгдээд ашиглалтад өгөхөд бэлэн болсон.

-Хөгжлийн банкны санхүүжилт орж ирэхгүй байгаагаас болж 17 томоохон замын ажил зогсоод байгаа гэсэн. Энэ асуудал юу болж байна вэ?

-Хөгжлийн банкны санхүүжилтээр 13 замыг засч, шинэчлэхээр гэрээ хийсэн байна. Одоогоор дөрвөн замын санхүүжилт хүлээгдэж байгаа юм. Бусад нь гэрээгээ хийж, ажил нь эхэлсэн байгаа. Зарим замууд нь он дамжиж 2013, 2014 онд ашиглалтад орох юм.

Х.ЦЭНД-АЮУШ /top.mn/