“Сайншанд аж үйлдвэрийн цогцолбор”-ын мастер төлөвлөгөөний үр дүнг өнөөдөр Үндэсний хөгжил, шинэтгэлийн хороо, “Бектел” компани, Хөгжлийн банкны удирдлагууд Үндэсний хөгжил, шинэтгэлийн хорооны хурлын танхимд танилцуулсан юм. 

“Сайншанд аж үйлдвэрийн цогцолбор”-ын мастер төлөвлөгөөг зургаадугаар сарын 25-ны Засгийн газрын хуралдаанаар хэлэлцэн баталсан юм. Төлөвлөгөөнд тусгаснаар, Сайншандын аж үйлдвэрийн цогцолборыг байгуулах нийт өртөг 9.3 тэрбум ам.доллар гэж тооцоо гарсан бөгөөд цогцолборыг түшиглэн кокс, зэс хайлах, үрлэн төмөр, цементийн үйлдвэр байгуулах аж. 

Мөн жилдээ 12 сая тонн түүхий эд, материал, долоон сая гаруй тонн боловсруулсан бүтээгдэхүүний тээвэрлэлт хийх учир ачаа, тээврийн иж бүрэн байгууламж барих тухай албаныхан хэлсэн юм. 

Энэхүү уулзалтын гол зорилго нь уг төслийг сонирхож буй аж ахуй нэгж байгууллагуудад танилцуулах, төслийг цаашид хэрэгжүүлэхтэй холбогдуулан дотоодын хөрөнгө оруулагчидтай хамран ажиллах талаар санал бодлоо хуваалцаж хамтын ажиллагааг өргөжүүлэхэд чиглэжээ. /top.mn/