Нийслэлийн иргэдийн төлөөлөгчдийн дарга Д.Баттулга нийслэлд шинээр барилга барихыг хориглосон шийдвэр гаргаж, нийслэлийн Мэргэжлийн хяналтын газар, Газрын албанд албан бичиг хүргүүлээд байгаа. Тэгвэл энэхүү шийдвэр барилгын компаниудад хэрхэн нөлөөлж байгаа талаар тодрууллаа.

“Алтай констракшн” ХХК-ийн захирал н.Батбаасан: Хотын хөгжлийн талаар хотоос авч хэрэгжүүлж байгаа ажлууд байгаа байх. Тэр хүрээндээ ийм шийдвэр гаргасан байх. Манай компанийн хувьд энэ жил баригдахаар төлөвлөгдсөн барилгууд бүгд эхлээд баригдаж байгаа. Тиймээс энэ жил эхэлсэн барилгуудаа дуусгана. Ерөнхийдөө баригдахаар төлөвлөгдсөн барилгууд байгаа. Гэхдээ барилгын ажил энэ жил шинээр эхлэхгүй. Дараа жилээс эхэлнэ.
 
“Бридж констракшн” ХХК-ийн захирал н.Дорждэрэм: Хот төлөвлөлтийн дагуу явдаггүй учраас үнэндээ хотын төв хэцүү болоод байгаа. Тийм учраас миний хувьд энэ шийдвэртэй санал нэг байгаа. Гэхдээ огт шинээр барилга барихгүй байна гэж юу байх вэ. Тиймээс хотын төвд хориг тавиад, хотынхоо захад барилга барихыг зөвшөөрөх нь зүйтэй болов уу гэж бодож байна. Нөгөөтэйгүүр төлөвлөгөөгүй олон орон сууц барисан. Хамгийн гол нь чанаргүй олон барилга баригдаж байгаад би их сэтгэл эмзэглэж явдаг хүн. Иймээс барилгын чанарын асуудлыг нэгдүгээрт тавих нь зүйтэй. Хүн амынхаа аюулгүй байдлын үүднээс энэ хамгийн түрүүнд байх ёстой асуудал учир үүнийг авч үзээсэй гэж бодож байгаа. Манай компанийн хувьд баригдахаар төлөвлөгдсөн ажлууд бий. Гэхдээ энэ шийдвэр миний ажилд шууд нөлөөлсөн зүйл байхгүй.

“Эко констракшн” ХХК-ийн инженер н.Энхтуяа: Хачирхалтай шийдвэр санагдсан. Ийм шийдвэр гарсан талаар мэдээллийн хэрэгслүүдээс уншсан. Манай компанийн хувьд энэ жил баригдахаар төлөвлөгдсөн барилгууд төлөвлөгөөнийхөө дагуу эхлээд баригдаад явж байгаа. Одоо энэ жилдээ шинээр барилга баригдахгүй. Ирэх жилд эхлэх төлөвлөгөөт ажлууд бий.
 
“Гангар инвест” ХХК-ын инженер/нэрээ нууцлав/: Тийм шийдвэр гарсныг мэдээгүй юм байна. Та бүхнээс л сонслоо. Огт шинээр барилга бариулахгүй гэсэн үг биш байх аа. Ямар ч байсан тодорхой хугацаа, эсвэл байршил заасан байлгүй дээ. Түүнээс нийслэлд шинээр барилга бариулахгүй байна гэдэг юу л бол. Манай компанийн хувьд цаашдаа шинээр баригдах барилгууд төлөвлөгдсөн байгаа.

Н.БУДСҮРЭН /www.info.mn/