Орон сууц санхүүжилтийн корпорацийн удирдлагууд салбарынхаа сайдтай уулзаж өдгөө тулгамдаад байгаа асуудлаар дэлгэрэнгүй ярилцав. Засгийн газар “100 мянган айлын орон сууц” хөтөлбөрийн хүрээнд жилийн зургаан хувийн хүүтэй зээл олгохоор болсон ч гацаа үүсээд байгаа билээ. Энэхүү орон сууцны зээлийг Капитал, Төрийн банкуудаар дамжуулан олгохоор болж, улмаар иргэдэд эхнээсээ хүрч эхэлсэн тухай яриа газар авч байв. Гэсэн хэдий ч одоогоор ганц Төрийн банк л “100 мянган айлын орон сууц” хөтөлбөрийн хүрээнд жилийн зургаан хувийн хүүтэй орон сууцны зээлийн материалыг бүрдүүлэн авч байгаа тухай сураг чих дэлсэв. Зээлийн өргөдлийг өнгөрсөн дөрөвдүгээр сараас Орон сууц санхүүжилтийн корпораци авч эхэлсэн бөгөөд 3026 иргэн зээлд хамрагдахыг хүссэн материалиа өгчээ. Үүнийг Төрийн банкинд хүргүүлсэн ч эхний ээлжинд ердөө 271 иргэнд 10,1 тэрбум төгрөгийн зээл олгосон байна. Үлдсэн зээл хүсэгчдийн тухайд тодорхой шийдвэрт хүрээгүй байна. Уг нь Хөгжлийн банк жилийн зургаан хувийн хүүтэй орон сууцны хөнгөлөлттэй зээлдзориулан 20 тэрбум төгрөг ийг Төрийн банк уруу шилжүүлжээ. Энэ талаар Орон сууц санхүүжилтийн корпорацийн гүйцэтгэх захирал Ж.Алдаржавхлан хэлэхдээ “Иргэдийн өргөдлийг авч хэлэлцээд нөхцөл бололцоондоо тааруулан зээл олгоно гэсэн ч иргэд өөрсдөө барилгын компанийн тавьсан шаардлагыг хангахгүй байна. Тиймээс боломжоо бүрэн ашиглаж чадахгүй байгаа” гэсэн юм. Өөрөөр хэлбэл, орон сууцны зээл хүссэн иргэдийн материал банкны ч, барилгын компанийн тавьсан шаардлагыг ч хангахгүй байгаа аж. Нөгөө талд орон сууцны хөнгөлөлттэй зээлд зориулсан хөрөнгө оруулалт орж ирэхгүй байгаа гэнэ. Энэ үеэр албаны хүмүүс “100 мянган айлын орон сууц” хөтөлбөрийг хэрэгжихэд төрийн дэмжлэг ихээхэн хэрэгтэй байгааг ч дурдаж байсан. Түүнчлэн “100 мянган айлын орон сууц“ хөтөлбөрт анх 249 барилгын компанийн 131 мянга 448 орон сууц хамрагдах байсан ч өнөөдрийн байдлаар 85 компанийн 3026 орон сууц иргэдийн гарт очихоор болоод байгаа юм. Уг нь энэ хөтөлбөрт оролцох барилгын компани олон байдаг ч урт хугацааны зээл, урьдчилгаа төлбөр бага байдаг учраас төдийлөн шамддаггүй аж. Тиймээс Орон сууц санхүүжилтийн корпорацийн гүйцэтгэх захирал Ж.Алдаржавхлан салбарын сайдад “100 мянган айлын орон сууц” хөтөлбөрийг хэрэгжүүлэхэд төрийн оролцоо чухал байгааг онцолж байлаа. Тэр тусмаа орон сууцны зээл олгох бие даасан банктай болох саналаа уламжлав.