Зам тээвэр, барилга, хот байгуулалтын яам хоёр тусдаа яам болон хуваагдсан. Ард түмэнд хамгийн их хамааралтай, асуудал элбэгтэй тус яамдуудыг ийн салгасан нь үнэхээр зөв шийдвэр болсон. Тэгэхгүй бол энэ хоёр салбарыг нэг хүн амжилттай удирдах нь төгс гэгээрэхээс ч  хэцүү  байж мэдэх. Ямартай ч шинэ засгийн газар байгуулагдаж сайд нар ажилдаа орж,  нийслэлийн удирдлагууд ч  идэвхийлэн ажиллаж байгаа нь ил тод харагдаж, ашгүй нэг хөгжих цаг нь ирээ юм болов уу гэсэн итгэл найдварыг ард иргэдэд өгөөд байна.

         Нийслэлчүүдийн шүдний өвчин болсон түгжрээг багасгах зорилгоор олон, олон төсөл санаачилсан нь эхнээсээ хэрэгжээд эхлэв.  Автобус нэгдүгээр замаар явах мөн улсын дугаараар ангилж явуулах  дүрэм нь амжилттай хэрэгжиж байгаа нь   олон хүний бухимдлыг инээдээр солив.

Ямар сайхан юм бэ,  дөчин минут  явдаг газар арван найман  минут яваад ирлээ, өнөөдрөөс эхлээд ажилдаа хоцрохгүй нь гэх яриаг нэг биш хүнээс сонслоо. Үнэхээр л автобус нэгдүгээр эгнээгээрээ явж, дугаараар ангилдаг  нь  заншчих юм бол хурдан явдагаар нь хүссэн хүсээгүй хүмүүс автобусанд л суухыг хичээнэ. Гэвч автобусанд суухад бас асуудал байна аа.  Үнэр танар, харилцааны  соёл, хэт их хүний ачаалал  гээд олон асуудал бий.  Эдгээр асуудлыг шийдээд энэ дүрмээ бариад байвал, шинэчлэгдсэн Улаанбаатарын  эхлэл тавигдах гээд  байна. Монголын хууль гурав хоногт гэдэг шиг эргээд л хэвэндээ орчихгүй бол эхлэл нь ер нь давгүй шүү.
                                                                                                                                                                                                                                Л.Мөнхчимэг