Барилга.MН, БЗМТөвөөс зохион байгуулдаг “Барилга экспо -2012” олон улсын үзэсгэлэн яармаг болох гэж байгаатай холбогдуулан  “Монгол даатгал” компанитай хамтран  “Барилгын салбарын эрсдэлийн удирдлага ба даатгал” нэртэй сургалтыг барилгын компаниудын хүрээнд зохион байгууллаа. 

      Эрсдэл ихтэйд тооцогдох тус салбарт зориулсан хэд хэдэн даатгалын төрлүүд байдаг гэнэ. Барилга угсралтын, ачаа тээврийн,  хариуцлагын,тоног төхөөрөмж, бараа материалын, ажил олгогчийн даатгал гээд олон төрлүүдээс сонгож даатгуулах боломжтой юм.  “Эрсдэлийг тооцож байж амжилт ирдэг” гэдэгчилэн барилгын  компаниуд  даатгалын үйлчилгээг илүүд үздэг болж. Энэ талаар Монгол даатгалын ерөнхий менежир Т.Гомбожаваас тодрууллаа.

-Монголд үйл ажиллагаагаа явуулдаг гадаад дотоодын олон компаниуд нэг дор цугларлаа. Сургалтаар юуг ойлгуулахыг хүссэн бэ?
       -Юуны түрүүнд ийм хэрэгцээтэй сургалт хамтран зохион байгуулж байгаа танай хамт олонд талархал илэрхийлье. Барилгын салбар бол дэлхийн түвшинд эрсдэл өндөртэй  салбарт тооцогддог.  Гэтэл манай монголд энэ талын мэдээлэл их хомс. Бид энэ удаагийн сургалтаараа барилгын компаниудын эрсдэлийн даатгал гэж яг юу болох, компаниуд ямар эрсдэл байгаагаа олж мэдэх, ямар зах зээл дээр яаж даатгуулах вэ, гэрээ хэлэлцээрийн хувьд яавал үр ашигтай байх вэ, үнэлгээгээ яаж хийлгэх вэ гээд олон талын мэдээлэл өгөхийг зорьлоо. Гал түймэр, газар хөдлөл, байгалийн гамшиг гээд биднээс шалтгаалах, үл шалтгаалах олон  эрсдэлүүдийг бид тооцох л  хэрэгтэй. 

-Монголд эрсдэлээ даатгуулсан барилгын компаниуд хэр их байдаг вэ?
      -Нилээдгүй олон компани үйл ажиллагаагаа даатгуулж бидэнтэй хамтран ажилладаг. Ялангуяа  олон улсын хөрөнгө оруулалттай компаниуд энэ тал дээр их ач холбогдол өгдөг. Харин дотоодын барилгын компаниудын хувьд энэ талын мэдээлэл ховор байгаа гэж ойлгож болно.

      Ер нь  дэлхий даяар эрсдэл гэдгийг амжилтаасаа илүүд тооцдог болсон. Мэдээж эрсдэлээс хамгаалагдсан байж л сая “аюулгүй” амжилт ирнэ шүү дээ. Барилгын компаниуд эрсдэлээ даатгуулснаар аливаа нэг эд хөрөнгө, амь нас, хариуцлага, санхүүгийн алдагдлаас хамгаалагдах юм.

-Ярилцсанд баярлалаа. Танд амжилт хүсье.                                                                                                                 Л.Мөнхчимэг