Төрийн албаныхан гэж иргэдийг чирэгдүүлсэн эрх мэдэлтнүүд, хүнийг гэх сэтгэлгүй хүнд сурталтнууд гэж  ярьдаг. Энэ нь үнэн. Харин ажлаа аваад удаагүй байгаа Монгол Улсын Ерөнхий сайд Н.Алтанхуяг  энэ тал дээр анхаарлаа хандуулж,  43 агентлагийн ажил, үүргийн давхардлыг арилгаж, хүнд суртлын шат дамжлагыг цөөлж, идэвхитэй чирэгдэлгүй ажиллуулах зорилгоор Засгийн газрын  ээлжит бус хуралдаанаар тус асуудлыг  хэлэлцэж зарим агентлагийг татан буулгаж, холбогдох яамдад нь шилжүүлсэн билээ.  Ингэснээр Засгийн газар тохируулагч 11, хэрэгжүүлэгч 17, нийт 28 агентлагтай болсон юм.

Татан буугдсан агентлагийн албан хаагчдыг орон тоо, цалингийн сангийн хамт тухайн асуудлыг хариуцсан яамны мэдэлд шилжүүлэхээр болсон юм.

          Үүнд:  Үндэсний хөгжил, шинэтгэлийн хороо, Мэдээлэл, шуудан, харилцаа холбоо, технологийн газар, Хүүхдийн төлөө газар, Төр, засгийн үйлчилгээ, аж ахуйг эрхлэх газар, Удирдлагын академи, Дипломат байгууллагын үйлчилгээ, аж ахуйн газар, Гадаадын хөрөнгө оруулалтын газар, Ойн газар, Усны газар, Соёл, урлагийн хороо, Мэргэжлийн боловсрол, сургалтын газар, Төмөр замын газар, Авто тээврийн газар, Авто замын газар, Газрын харилцаа, барилга, геодези, зураг зүйн газар, Хөдөлмөр, халамжийн үйлчилгээний газар, Жижиг, дунд үйлдвэрийн газар, Эрчим хүчний газар, Биеийн тамир, спортын газар, Эрүүл мэндийн газруудыг татан буулгасан.

       Газрын харилцаа, барилга, геодези, зураг зүйн газар одоогоор үйл ажиллагаагаа зогсоож, хүлээлтийн байдалтай байна. Баттай бус эх сурвалжаар Газрын харилцаа, геодези, зураг зүйн газар болж  “Барилга”-аас өрх тусгаарлан цомхон үйл ажиллагаагаа явуулах сурагтай.
                                                                                                                                                                          

                                                                                                                                                                          Л.Мөнхчимэг