Барилга хот байгуулалтын сайдаар томилогдон тамга хүлээж аваад удаагүй байгаа Ц.Баярсайхан яам, харьяа газар, агентлагийнхаа үйл ажиллагаатай танилцаад амжсан. Энэ жил газрын харилцаа геодези зураг зүйн салбарт 15 тэрбум төгрөгийн хөрөнгө оруулалт батлагдсан бөгөөд энэ хөрөнгөөр “Үндэсний орон зайн мэдээллийн төв” байгуулах шаардлага байгааг салбарынхан сайддаа хэлж байсан. Өнгөрсөн жилүүдэд хот тосгоны хөгжлийн ерөнхий төлөвлөгөөг боловсруулсанаас гадна 40 гаруй сумын ерөнхий төлөвлөгөөг шинэчилжээ.

     Барилга хот байгуулалтын сайд Ц.Баярсайхан “ Шинээр томилогдож ирээд та бүхэнтэй уулзаж ярилцаж байна. Юун түрүүнд салбарын эрх зүйн орчныг сайжруулахад анхаарч ажиллана. Дотооддоо барилгын материал үйлдвэрлэлийг дэмжих, уламжлалт барилгын материалын оронд дулааны алдагдал багатай шинэ технологи нэвтрүүлэх нь чухал юм. Барилгын салбар бол  арилжааны банкны зээл дээр явдаг, улирлын чанартай онцлог салбар. Тиймээс энэ салбарт ажиллаж буй хүмүүсийн нийгмийн асуудал анхаарлаа хандуулах ажлын нэг байх болно. Энэ мэт дурьдвал эрх зүй, зохион байгуулалтын хувьд хийх ажил олон байна” гэж хэлэв.

     Засгийн газрын гишүүн, Барилга хот байгуулалтын сайд Ц.Баярсайхан 1996-2000 онд Ардчилсан нам парламентад олонхи байхдаа орон сууц хувьчлах бодлого явуулсан. Энэ нь орон сууцны зах зээлийг хөгжүүлэх олон хүний  амьдралд тустай зүйлийн эхлэл болсон юм. Иргэдээ ажил орлоготой байлгавал орон сууц авах хүсэл, эрэлт хэрэгцээ их байна.  Тэр  ч утгаараа Засгийн газар Хөдөлмөрийн яамыг байгуулсан. Тус яам энэ салбарт ажиллах хүмүүсийг бэлтгэх зорилготой юм.