Намар болжээ. Жил бүрийн наймдугаар сарын дундуур хот хөдөөгүй хөл хөдөлгөөн нэмэгдэж, эцэг эхчүүд хүүхдийнхээ хичээлийн хэрэгсэл, дүрэмт хувцас, өвлийн бэлтгэл гээд багагүй ажилтай байдаг үе. Нэгэнт намар цаг ирсэн хойно араас нь шил даран өвөл ирнэ. Өөрөөр хэлбэл нийслэлчүүдийн толгойн өвчин утааны сар айсуй.  Засгийн газар ч  жилийн жилд утааг бууруулахаар багагүй ажил хийдэг. Өнгөрсөн жилийн хувьд хязгаарлалтын бүс дэх 70 мянган өрхөд тусгай шүүлтүүртэй, утаа бага ялгаруулдаг турк зуухыг 95 хувийн хөнгөлөлттэй нийлүүлсэн. 1000 гаруй автомашиныг утааны шүүлтүүртэй болгож, 400 гаруй автобусыг дизель болон хийн хосолмол хөдөлгүүрт шилжүүлжээ.  Одоогоор хийгээр цэнэглэдэг дөрвөн ч станцыг нэмж барьж байгаагаас гадна ирэх сарын эхээр есөн дуобусыг үйлчилгээнд гаргах гэж байгаа аж. Засгийн газраас санаачлан зохион байгуулсан эдгээр ажлын үр дүнд агаарын бохирдол 10 гаруй хувиар буусныг Агаарын чанарын албанаас тогтоогдоод  байна. Энэ жилийн хувьд  “Утаагүй зуух” төсөл дахин хэрэгжинэ.  Гэхдээ нийслэлийн Агаарын чанарын албанаас тендер зарлаж, усан халаалттай канад зуухыг нийлүүлээр болсон байна. Энэхүү зуух нь турк зуухнаас 30-50 метр талбайг илүү халаах хүчин чадалтай бөгөөд хязгаарлалтын шинэ бүсэд багтсан бүх хороонд усан халаалттай зуухыг авсан иргэдийн  18 цагаас өглөө 09 цаг хүртэлх цахилгааныг 50 хувь хөнгөлөх юм байна.  Канад зуух  үнийн хувьд хөнгөлөлттэй байхаар яригдаж байгаа ч одоогоор хэдэн төгрөгөөр худалдах,  үнийн хувьд ямар хөнгөлөлт үзүүлэх талаар тодорхой шийдээгүй байгаа ажээ.

 Г.Энхтуяа /zindaa.mn/