Манай нийслэл нэг сая иргэнтэй метрополис хот болоод удаж байна. Хөдөөнөөс хот руу шилжин ирэх иргэдийн тоог даган асуудал болоод байгаа утааны хэмжээ мөн нэмэгдсээр байгаа юм.  Гэхдээ тэднийг хорих эрх бидэнд байхгүй. Учир нь, “Монгол улсын иргэн эх орондоо хаана ч дураараа амьдарна" гээд хуулиндаа заачихсан байдаг. Хотын утаа хөдөөнийхнөөс болж ихэслээ л гэнэ. Утаа гарах нь аргагүй шүү дээ, хүн юм хойно хоол иднэ. Утаа гарчих байх гэж галгүй суусаар хөлдөж үхэхгүй нь тодорхой. Дан ганц ч гэр хорооллын утаа хотыг ийм хэмжээнд хүргээд байгаа юм биш. Үнэн хэрэгтээ хотын энэ их утаа олон зүйлтэй холбоотой. Нийслэлийн хэмжээнд байгаа машин хэд билээ гэдэг нь нүдэнд үзэгдэж буй тодорхой баримт. Мөн ардчилалтай бараг нас чацуу, өнөөгийн нийслэлийн өнгө төрх болтлоо хурж хуримтлагдсан хог, хашаа байшингийн булан тохойд байх өтгөн шингэний үнэр гэх мэт гадны хүний бөөлжис цутгамаар дүр зураг олон бий. Яагаад гадны хүн гэж онцлов гэхээр манайхан аль хэдий нь энэ байдалдаа дасч, хог харахгүй бол нүд нь өвдөж, утаа үнэртэхгүй бол хамар нь битүүрдэг болжээ гэхэд үнэнээс нэг их хол тусахгүй байх. Энэ л “яруу” гутамшигт дүр зураг улам тодорсоор олон олон жилийг үдлээ. Доодост бус дээдэст тустай хууль тогтоомжийг харсаар нэгэн насны тал дуусах нь ээ. Манай ихэс дээдэст хачирхалтай нэгэн зан байна аа. Тэр юу вэ гэвээс өмнөх амьдралаа мартчихдаг явдал. Утаандаа хахан цацаж өвөлжөөд, хавар болмогц мартаж, зун цагаар зугаалж, намартаа найрлаж байгаад өвөл болохоор утаатай гэдгээ гэнэт санаж, утаагүй Улаанбаатар болгоно гээд баахан л мөнгөөр “тоглоцгоодог”.  Түүний нэг тод жишээ бол утаа гардаггүй түлш. Утаагүй гэж нэрлэх нь аргагүй юм. Учир нь тэр түлш асдаггүй, тийм болохоор утаа ч уугидаггүй юм. Ард түмэн ядуу болохоос тэнэг биш шүү дээ, тийм зүйл “шороог" авахгүй хүмүүс. Ингээд л Налайхын нүүрсийг өрдөж гарна даа. Нийслэлээс сонгогдсон бүх гишүүн "Утааг багасгана, угааргүй болгоно” гэж гуйж гувшин гарч ирсэн. Гэтэл утаа улам бүр өргөжин тэлж, өтгөн хар саарал манан шиг болсоор  л байна. Өнгөрсөн жил нийслэлийн агаарын чанарын албанаас утааг багасгахаар хэд хэдэн ажил явуулжзэ. Даанч    дорвижиж, газар авсангүй. Утаа устгадаг багаж бутээсэн ч ачааллаа дийлэлгүй эвдэрсэн үү бүү мэд ямартай ч дэмий зарлага болсон. Одоогийн нийслэлийн агаарын чанарын албаны хийж буй ганц ажил нь агаарын бохирдлоо хэмжих. Арга ч үгүй биз, өөр хийж чадах зүйлгүй, хэмжих газаргүй юм хойно. Мундагчуулын одоо ярьдаг зүйл нь гэр хорооллыг барилгажуулах явдал гэнэ. Өнөө маргаашдаа барихгүй нь лав. Үнэхээр утааг багасгая гэвэл гэр хорооллыг төвийн бохир, цэвэр устай холбож цахилгааны үнийг чөлөөлчихвөл болчих асуудал. Ингэхийн тулд нэмэлт цахилгаан станцуудыг барих шаардлагатай. Олон жижиг амбаар барьж байснаас нэг цогц байгууламжийг барьчих нь ашигтай шүү дээ. Манай орон ураны ордтой, олон жилийн нөөцтэй болохоор гаднаас айлтгүй шийдэж болох л асуудал. Ус, цахилгааныг нь ийнхүү шийдээд өгчихвөл ард түмэн өөрсдөө байшингаа барьж, утаа уугиулалгүй цахилгаанаар халааж, амар жимэр аж төрөх билээ. Duulian.mn