МУ-ын Засгийн газраас гэр хорооллыг орон сууцжуулах хөтөлбөр буюу “100.000 айлын орон сууц” хөтөлбөрийг биелэлээ олохыг хамгийн их хүлээж байгаа хүмүүс бол ард түмэн. Хөтөлбөрийг зарласанаас хойш нэгэн багагүй хугацаа өнгөрч байна. Энэ хөтөлбөрийн сургаар монголчууд тэр дундуу гэр хорооллынхон хөл нь газар хүрэхгүй баярлаж, ОССК иргэдийн өргөдөл, бичиг баримтанд хэсэгтээ л дарагдсан. Арга ч үгүй биз жилийн зургаахан хувийн хүүтэй, урт хугацааны зээлээр мөрөөдөл болсон тохилог орон сууцтай болох боломж олдож байгаа хойно.

   Энэ хөтөлбөр анхнаасаа орон сууцны эрэлт, нийлүүлэлтийн тэнцвэрт байдлыг хангаж бага, дунд орлоготой иргэдийг орон сууцжуулахын зэрэгцээ үндэсний барилгын компаниудаа дэмжих агаарын бохирдлыг бууруулах давхар давхар зорилготой эхэлсэн. Хөтөлбөр ч эхэлж 6%-ийн зээлд хамрагдах боломжтой барилгын компаниудын жагсаалтыг гаргаж эхэлсэн. Үүнтэй зэрэгцэн салбарын сайд орон сууцны м/кв-ынх нь үнийг 910-1.1 сая төгрөг байхаар тогтоосон.

      “100.000 айлын орон сууц” хөтөлбөр зарлагдсанаас хойш төрийн банкнаас 370 иргэн зээлээ аваад байгаа юм байна. Харин ОССК 2840 гаруй иргэдийн хүсэлтийг хүлээж аваад байна. Зээлийн явцыг удаашруулж байгаа нэг зүйл нь иргэд орлогоо тодорхойлж чадахгүй байгаа явдал юм. Тэгсэн хэрнээ бүгд 50 сая төгрөгийн зээл авахыг хүсч байгааг ОССК-ын мэргэжилтнүүд хэлж байгаа юм.

     Хөгжлийн банкнаас  “100 мянган айлын орон сууц” хөтөлбөрийг хэрэгжүүлэхэд 50 тэрбум төгрөгийн санхүүжилт гаргахыг зөвшөөрсөн. Эхний ээлжинд 20 гаруй тэрбум төгрөгийн асуудлыг шийдвэрлэсэн байгаа ба үлдэгдэл 30 тэрбум төгрөгийн санхүүжилтийг удахгүй шийдэх гэнэ.

      Харин зээл өгч байгаа Төрийн банкны 115 дугаар салбарт 2840 хүний материал ирсэн бөгөөд дөнгөж 500 дахь иргэнтэй зээлийн мэргэжилтэн нь уулзаад байгаа аж. 6%-ийн зээлд хамрагдах гэсэн иргэдийн хичнээн сар ч хүлээсэн хамаагүй, тохилог байртай болох хүсэлтэй учир тэвчээртэй хүлээсээр байна.