Жил ирэх тусам барилгын материалын үнэ өссөөр байна. Энэ үнийн өсөлт чухам ямар шалтгаантай байдаг юм бол?. Барилгын материал бүтээгдэхүүн худалдан авах гэж байгаа хүмүүс төвлөрсөн нэг цэг “Гурвалжин”, “100 айл”-ын барилгын захуудыг зорьдог. Шороо босож, машин тавих зайгүй чихсэн энэ газар хамгийн их үйлчүүлэгчтэй, хөл хөдөлгөөн тасрахгүй.
Эдгээр захууд дээр барилгын материалын гол нэр төрлийн бүтээгдэхүүний томоохон бөөний цэгүүд байдаг. Эндээс л барилгын материалын үнийн өсөлт юунаас болоод байгааг тодрууллаа. Үнийн өсөлтийн шалтгааныг хамгийн сайн мэдэх хүмүүс энд байж болох юм. Учир нь халуун цэг дээр нь олон жил ажиллаж байгаа учраас тэр.
Хамгийн эхэнд цементийн үнийг судаллаа. Хятад улсад үйлдвэрлэсэн шуудай цемент нь 9000 төгрөгийн үнэтэй байна. Уг цемент бусад төрлийн цементээс хамгийн хямд үнэтэй учир иргэд хамгийн их худалдан авдаг. Өнгөрсөн жил 7000 төгрөг байсан цементийн үнийн оргил үе нь өнгөрсөн жилийн намар 12,000 төгрөг хүрсэн. Одоо 9000 төгрөг байгаа цементийн үнэ яаж ч өөрчлөгдөж магадгүй.
Дараагийн материал бол тоосго. Хятад, Монголын ердийн тоосго бас өнгөлгөөний гээд олон төрлийн тоосго байна. Иргэдийн их хэрэглэдэг тоосго нь бас Хятад тоосго. Учир нь хямдхан. Энэ тоосгоны үнэ өнгөрсөн жил 100-150 төгрөг байсан бол энэ жил 270-320 төгрөг болтлоо өссөн. Манай барьж байгаа зуслангийн байшин 6,5х5,5 хэмжээтэй нэг их том биш ч бас жижигхэн биш. Хэрвээ би байшингийнхаа гадна талыг тоосгоор өнгөлөхөөр бол ойролцоогоор 6000 тоосго орж 1,5-1,8 сая төгрөг болно. Харин өнгөрсөн жил байшингаа барьсан бол сая гаруй төгрөг хэмнэж болох байжээ.
Харин улаан тоосгоны үнэ ганцаараа 2,5 дахин өссөн. “Тоосгоны үнэ яагаад ингэж өсвөө?” гэсэн асуултанд худалдаачид “Элс, хайрганы үнэ нэмэгдсэн,учир нь элс хайрганы карьерын ихэнхийг хаачихсан”. Тиймээс түүгээр дүүргэгч материал нь болдог блок-гулдмай хийх боломж багасаж байна гэсэн хариултыг өгсөн юм.
Дараагийнх нь блок. Блокнууд төрөл, төрлөөрөө л байна. Үнийг нь судлаад үзэхэд 1000-1100 төгрөг, өнгөлгөөний блокнууд 1300 төгрөг байна. Өнгөрсөн жил ямар үнэтэй байсан бол гээд судлаад үзтэл 900 төгрөг байжээ. Бас өөрийн хэмжээндээ өссөн боловч тоосгоны үнийн өсөлттэй харьцуулахад өсөлт нь харьцангуй гайгүй байна.
Барилгын материалын үнэ өссөөр л байна. Холбогдох байгууллагууд үнийг бууруулах тал дээр ямар арга хэмжээ авч байгаа нь тодорхойгүй байсаар л байна.
