Нийслэлчүүдийн нэн тэргүүний тулгамдсан асуудал болох утаатай золгох улирал хаяанд ирлээ. Нийслэлийн агаарын бохирдлыг буруулах олон янзын зуух болон түлшний талаар ярьдаг. Энэ удаад  хязгаарлалтын бүсэд багтах айл  өрхөд усан халаалттай зуух нийлүүлэх гэж буй тухай Нийслэлийн агаарын чанарын албаны мэргэжилтэн Х.Галсамбекээс тодруулахад дараах хариултыг өглөө.

-Энэ жил нийслэлийн утааг бууруулах ямар ажил хийхээр төлөвлөөд байна вэ?
-Өнгөрсөн жил Засгийн газраас агаарын бохирдлыг бууруулах талаар олон арга хэмжээ зохион байгуулж ажилласан. Түүний дотор хязгаарлалтын бүсэд 70 мянган өрхөд тусгай шүүлтүүртэй, утаа бага ялгаруулдаг, Турк зуухыг 95 хувийн хөнгөлөлттэй ний¬лүүлсэн. Харин энэ оноос ирэх жил хүртэл Нийслэлийн агаарын чанарыг сайжруулах төсөл болох усан халаалттай 20 мянган зуух нийлүүлэх  нээлттэй сонгон шалгаруулалтыг явууллаа. Сонгон шалгаруулалтад “Хүрд” компанийн Канад технологийн зуух шалгарсан. Тиймээс одоо зуух нийлүүлэх гэрээг уг компанитай байгуулан ажиллаж эхлээд байна.
-Усан халаалттай зуухны иргэдэд ямар үнээр нийлүүлэгдэх бол, мөн энэ жил утаа бага ялгаруулдаг зуухыг иргэдэд дахин нийлүүлэх үү?
-Усан халаалттай зуухны хувьд одоогоор Агаарын бохирдлыг бууруулах үндэсний хорооноос иргэдэд ямар үнээр түгээх шийдвэр нь гараагүй байгаа. Шийдвэр гарсны дараа иргэдэд хэдэн төгрөгөөр түгээх нь тодорхой болно. “Утаагүй зуух” төсөл энэ жил дахин хэрэгжээд явах учир утаа бага ялгаруулдаг зуухыг хэрэглэх боломжтой.
-Утаагүй зуух байшинд тохиромжгүй гэх иргэдийн шүүмжлэл байдаг. Шинээр орж ирж байгаа Канад зуух өмнөх зуухнуудаас ялгарах онцлог нь юу вэ?
-Усан халаалттай зуух нь утаагүй зуухнаас 30-50 ам метр талбайг халаах илүү хүчин чадалтай. Ер нь хоёр давхар байшинг ч халааж чадна. Тэгээд ч энэ зуух Канадад 70 гаруй жил хэрэглээд туршигдчихсан. Тиймээс гэр байшингын алинд ч  тохиромжтой.
-“Утаагүй зуух” авсан иргэд усан халаалттай зуух авах шаардлагатай юу. Мөн утаагүй болон усан халаалтын зуухтай айл өрхүүдийн хэрэглээ ямар байна?
-Ер нь Баянгол дүүрэгт боловсруулсан түлш нийлүүлдэг. Тиймээс Баянгол дүүргийг хасаад зуух тараах нийт 173 мянга орчим өрх байгаа. Эдгээр өрхүүдийн 10 хувь нь буюу 20 орчим мянган айл нь усан халаалтын зуухтай байсан. Уг айлууд ердийн халаалттай зуух авахгүй усан халаалттай зуух хэрэгтэй байна гэсэн учир тухайн иргэдийн санал хүсэлтэд тулгуурлан энэ жилээс дээрх өрхүүдэд уг зуухыг нийлүүлэхээр болсон. Тиймээс урд жил “Утаагүй зуух” авсан айлууд усан халаалттай зуух авах шаардлага байхгүй.  
-Усан халаалттай зуух авахад ямар нэгэн хөнгөлөлт үзүүлэх үү?
-Усан халаалттай зуухыг худалдаалах үнэ нь гараагүй байгаа учираас одоогоор хөнгөлөлт үзүүлэх эсэх нь тодорхойгүй байна. Гэхдээ өнгөрсөн жилийнх шиг 95 хувийн хөнгөлөлт үзүүлэхгүй байх.

Ч.ГАНАА  /top.mn/