Нийслэлийн удирдлагууд өөрсдийн хийж хэрэгжүүлэх ажил, үйл ажиллагаандаа иргэдийн санал хүсэлт, бодлыг тусгах зорилгоор иргэдийн дундах нээлттэй хэлэлцүүлэгийг зохион байгууллаа. Энэхүү хэлэлцүүлэгээр замбараагүй газар олголт, төлөвлөлт нь алдагдсан хот байгуулалт, төлөвлөлт, барилгажилтын талаар иргэддээ танилцуулага хийж, санал хүсэлтийг нь сонссон юм.

     Хэлэлцүүлэгийн эхэнд Улаанбаатар хотын ерөнхий архитектор Э.Хүрэлбаатар хот байгуулалтанд тулгамдаж байгаа асуудлын талаар хэлэлцүүлэгт ирсэн хүмүүст танилцуулсан юм. Улаанбаатар хотыг шинэчлэн өөрчилөхөөр 1930 оноос эхлэн 5 ерөнхий төлөвлөгөө батлагдсан байдаг. Хотыг шинэчлэн, хөгжүүлэх хамгийн ойр дөт арга зам нь бүсчлэлээр хөгжүүлэх ба 7 бүсчлэлд хуваан хөгжлийг эхлүүлэхээр болж байгаа юм байна. Мөн дэлхийн жишгээр газар доогуурх хотыг бий болгох боломжийг судлаж үзэх хэрэгтэйг ерөнхий архитектор яриандаа дурьдсан юм.

     Гэр хорооллыг орон сууцжуулах, инженерийн шугам сүлжээнд холбох асуудлыг нэн даруй шийдвэрлэх хэрэгтэй байгааг дурьдсан. Ингэсэн тохиолдолд хамгийн эхэнд 1-р хорооллын арын дэнжийн хэсгийн айлууд холбогдох боломжтой. Мөн Улаанбаатар хотод хүн амьдарч болохгүй 44 барилгын жагсаалт гарсан боловч үүний 2 барилгын асуудлыг л шийдвэрлэсэн. Үүнийг яаралтай ажил хэрэг болгох хэрэгтэйг сануулсан юм.

      Дан ганц барилгын асуудал хэлэлцсэнгүй. Хэлэлцүүлэгт хамгийн маргаантай асуудал нь газрын маргаан байлаа. Нийслэлийн газрын албанаас хийсэн мэдээлэлд иргэд ихээхэн дургүйцэж, худал мэдээлэл өглөө хэмээн эсэргүүцэж байсан. Энэ асуудал дээр багагүй шинэчлэлт, хийх ажил хэрэгтэй байгааг Хотын дарга анхааралдаа авсан гэдэгт итгэлтэй байна.

      НИТХ-ын ажлын хэсгийн ахлагч С.Очирбат “Газар олголт, хот байгуулалт, барилгажилтанд гарч буй зөрчил, арилгах арга зам, цаашид арга хэмжээ”-ний талаар мэдээлэл хийсэн юм. Одоогийн байдлаар хот төлөвлөлт, барилгажилтын норм, дүрэм шинэчлэгдээд явж байгаа ба хот байгуулалтын хуульд яаралтай өөрчлөлт оруулах хэрэгтэй байна.

     Мөн газар олголт нь хуулийн тодорхой заалтуудыг зөрчсөөр байна. Газрын зөвшөөрөл авсаны дараа зориулалтын бус барилга барилга байгууламж барьдаг асуудлыг цэгцлэхээр төлөвлөж байгаагаа дуулгасан. Мөн барилга угсралтын ажлаа эхлүүлсэний дараа зөвшөөрөлөө авдаг, барилга барихдаа нийтийн эзэмшлийн талбай руу оруулж барьдаг, зам талбай хаах, барилгаа барихдаа орчины тохилжилтгүй төлөвлөдөг зэрэг хуулийн тодорхой заалтуудыг зөрчөөд байгаа асуудлыг арилгах талаар анхааран ажиллахаар төлөвлөж байгаа юм байна.

      Цаашид төсөл сонгон шалгаруулалтаар газар олгох гэж байгаа тохиолдолд НИТХ-аар хэлэлцэж шийдвэрлэх хэрэгтэй. Энэ нь газар олголттой холбоотой зөрчлүүдийг арилгахад хэрэгтэй гэж үзэж байна.