Улс орны хөгжлийн хэмжүүр бол барилга байгууламж байдаг. Шинэ барилга байгууламж тэр дундаа орон сууцны хороолол ихээр баригдах нь сайн хэрэг. Гэвч зарим нэг барилгын компаниуд хөрөнгө мөнгөөр бүгдийг шийдэх, иргэдийн ая тухтай, таатай амьдрах нөхцөлийг хааж боогдуулан завсар зай болгонд барилга барих гэсэн улаан цагаандаа гарсаныг батлах нэгэн мэдээллийг хүргэж байна.

     Манайд Улаанбаатар хотын ерөнхий төлөвлөгөө алдагдсан, замбараагүй болсон гэдгийг та бүхэн бэлхэнээ мэдэж байгаа. Гэтэл зураг төсөл нь батлагдаагүй, экспертиз ч хийлгээгүй, гоё сайхан ногоон байгууламжтай энэ барилгыг барих зөвшөөрөл хэн гэдэг эрх мэдэлтний гарын үсгээр баригдах гэж байна вэ? Та бүхний харж байгаа энэ сайхан барилгыг Хан-Уул дүүрэгт барих газар байгаа болов уу?

     Энэ барилгын зурагт төсөлд эргэн тойрных нь барилгыг огт оруулаагүй байгаа нь хамгийн хачирхалтай. Энэ барилгын гүйцэтгэгчээр ажиллаж байгаа “Мандах инвест” ХХК-ийн захиалгаар 285 айлын орон сууцны зураг төслийг нь “ББСМО” ХХК хийсэн. Харин энэ барилгыг барих зөвшөөрлийг баталсан хүн нь Улаанбаатар хотын ерөнхий архитектор, хот байгуулалт төлөвлөлтийн газрын дарга Э.Хүрэлбаатар.  

     Иргэдээ орон сууцжуулах гэсэн нэрийн дор төрийн албан хаагчдын гарын үсэг бизнес болон цэцэглэж, дээр нь барилгын компаниуд хууль зөрчөөд байвал барилгын салбар юу болж хувирах билээ.

 

 

 

     Би Хан-Уул дүүргийн 15-р хороонд оршин суудаг. Нийслэлийн хот байгуулалт төлөвлөлтийн газрын хууль бус үйл ажиллагааны талаар мэдээлэл өгөх гэсэн юм. Энэ барилга нь 285 айлын орон сууц гэж байгаа. Барилгын зураг нь экспертизээр ороогүйгээс гадна эргэн тойрны орон сууцны барилгууд нь зураг төсөлд нь огт тусгагдаагүй, гадны барилгын зургыг шууд хуулаад зурчихсан.

     Цэлмэг гэж архитекторын үед хийсэн Улаанбаатар хотын ерөнхий төлөвлөгөөний зургыг үзэхээр холимог бүсд хамаарагддаг юм байна лээ. Холимог бүсд 5 давхар 38 айлын орон сууц барих зөвшөөрөлтэй. Үүнийг Э.Хүрэлбаатар дарга дур мэдэн өөрчилсөн. Энэ барилга барих гээд байгаа газар нь хүртэл хувийн эзэмшлийн газар. Гэтэл дуудлага сонгон шалгаруулалтаар оруулаагүй. Тэгэхээр энд бас газрын албаны улаан цагаандаа гарсан бизнес нь явагдаад байна.

      “Мандах инвест” гэж компани өмнө нь Жаргалан хотхон, Оддын хотхон гээд олон барилга барьсан. Ямар нэгэн тендер, сонгон шалгаруулалтгүйгээр энэ компани авдаг. Хан-Уул дүүргийн 15-р хорооны нягтрал ихтэй газар 16 давхар баригдаж болох юм бэ? Гэтэл Хан-Уул дүүрэг тэр дундаа цэцэрлэг сургууль хомс байна. Тэгж их барилга гээд байгаа юм бол цэцэрлэг сургууль барих хэрэгтэй байна.  

 

      Ерөнхий инженерээр нь Эрдэнтуяа гэж хүн байгаа. Харин зураг төслийг нь “ББСМО” ХХК Сүнжидмаа, ерөнхий архитектороор Хан-Уул дүүргийг хариуцсан ерөнхий архитектор Энхтүвшин гэсэн хүний гарын үсэгтэй баталгаажчихсан. Бид нар ГХБГЗЗГ-т очоод шүүлгэхэд “Манайхаар “Мандах инвест” ХХК 285 айлын орон сууцны барилга экспертизээр орж батлагдаагүй байна” гэсэн хариултыг өгсөн. Батлагдаагүй барилгын зураг төсөл дээр Улаанбаатар хотын ерөнхий архитектор нь гарын үсэг зурчихсан хууль бус үйл ажиллагаа явагдаад байна.

     Дээр нь Эрчим хүчний дарга Баярбаатарын 2012 оны 4 сарын 3-ний өдөр гаргасан тушаалд Хан-Уул дүүргийн баруун хэсэгт дулаан 5%-ийн илүү ачаалалтай ажиллаж байгаа. Тийм учраас техникийн нөхцөл өгөх боломжгүй гэсэн албан ёсны дүгнэлт гарчихсан байхад хуурамч дүгнэлтээр барилга бариад байж байна. Дарга нь зөвшөөрөхгүй байхад доод шатны ажилтнууд нь хахууль авч зөвшөөрөл өгсөн.

 

     Ямар ч боломжгүй. Эргэн тойрон орон сууцны хороолол байгаа. Орон сууцны хорооллын жижигхэн газарт л барилгаа барих гээд өдөр шөнөгүй улайран зүтгэж байна.