Монголдоо анхдагч Маркетингийн сургалт амжилттай болж өндөрлөлөө
Бодит маркетинг ТББ-ын багш, маркетингийн мэргэжилтэн: Б.Алтан-Оргил
Монголын маркетингийн хөгжил ямар түвшинд байгаа вэ?
Хаант засаглал дуусаад Манжийн дарлалд ороод, зах зээлийн нийгэмд нухлуулан, нийгмийн томоохон донсолгоонуудад өртсөн манай орны хувьд хувь хүний сэтгэхүйн үнэт зүйлс, туулийн зорилгоо гээчихсэн, хувь хүн гэсэн ойлголтоо сайн тодорхойлж чадахгүй байгаа учраас маркетингийн чиглэл хурдацтай хөгжинө гэдэг хэцүү. Анх ардчилсан нийгэм, чөлөөт зах зээл гэдэг зүйл бий болсноос хойш маркетингийн ойлголт Монголд орж ирэн, их бага хэмжээгээр хөгжиж явсан. Сүүлийн таван жилийн хугацаанд арай хурдацтай хөгжиж байна.
Та өөрийн бодлоороо маркетинг гэдэг ойлголтыг тодорхойлно уу?
Маркетинг гэдэг нь зах зээл дээр эрэлтийг бий болгож, түүнийгээ ханган нийлүүлэлтээр зөв зүйтэй хангахын тулд хийгдэж буй ажлын мэдрэмжинд суурилсан цогц ухаан юм. Маркетинг нь орон орны газарзүйн онцлог, зан заншил, хөгжлийн үйл явц гээд бүхий л зүйлсээс хамааран өөр өөрийн гэсэн онцлогтой байдаг.
Дэлхийн өндөр хөгжилтэй орнуудаас маркетингийн тал дээр суралцах зүйлс байдаг уу?
Америкийн хувьд анх PR үүсэн бий болсон улс орон учраас маркетингийн хөгжлөөрөө тэргүүлж байдаг. Дэлхийд судлагдаагүй түүхийн их өв соёл, баялагтай манай орон бол энэ их давуу тал дээрээ суурилан өөрийн онцлогтой маркетингийг гарган хөгжүүлвэл амжилт олно. Жишээ нь: Монголын авдран дээр байдаг үндэсний усан хээгээр графид гаргахад, дэлхий дахинд гайхагдаж байсан. Одоо бол хангалттай хуулж ханалаа, өөрсдийн гэсэн маркетингийн бодлогыг хэрэгжүүлцгээе.
Маркетингийн чиглэлээр таны хийж байсан томоохон ажлууд?
Би маркетингийн чиглэлээр 9 дэхь жилдээ ажиллаж байна. Монголын 50 гаруй байгууллагад маркетингийн зөвлөгөө өгч байсан. Шатахуун түгээх газруудын нефьт импорлогчдын PR, аялал жуулчлалын PR, улс төрийн PR-уудыг маркетингийн багуудтай хамтран гаргаж байсан.
Уг сургалтаараа хүмүүст юуг хүргэсэн бэ?
Сургалтаа Монгол хүний сэтгэхүйн онцлог болоод нийгмийн сэтгэхүйд тулгуурлаж чөлөөт байдлаар явуулсан. Энэ утгаараа Монголдоо анхдагч маркетингийн сургалт болж чадсан.
Сургалтанд суусан болон маркетингийн чиглэлээр ажиллаж, сурч, сонирхож байгаа залуусдаа хандаж юу хэлэх вэ?
Залуус маань өөрсдөө дайчин сонирхолтой байх хэрэгтэй. МУИС-д 7 томъёо заах, хувийн жижиг сургуульд 7 томъёо заах адилхан. Том нэр хүндтэй газар сураад сайн болчихгүй, өөрөө хичээж тууштай судалж чадвал чадварлаг боловсон хүчин, мэргэшсэн маркетер болж чадна.
Маркетер залуусдаа хандаж юу хэлэх вэ?
Судалгаан дээр суурилсан маркетингийг хөгжүүлье. Судалгаа сайн хийгдээгүй маркетинг бол “Тэнэсэн сумаар туулай онох”-той адил юм. Одоо Монголд мөнгөтэй л бол ямар ч мэдээллийн сувгаар бүхий л төрлийн сурталчилгаа явуулж байна. Үүнийгээ болиод оновчтой, чанартай хэдхэн сурталчилгааг гаргах хэрэгтэй.
За таньд ажлын амжилт хүсье. Монголдоо иймэрхүү үр өгөөжтэй маркетингийн сургалтыг цааш цаашдаа зохион байгуулж байгаарай. Баярлалаа.