"100 мянган айлын орон сууц" хөтөлбөрийн хүрээнд зургаан хувийн хүүтэй орон сууцны зээлийг иргэдэд олгож эхлээд хоёр сар шахам хугацаа өнгөрөөд байгаа. Хөгжлийн банкнаас 200 тэрбум төгрөгийн бондыг гаргаж, эхний 50 тэрбум төгрөгийн санхүүжилтийн эх үүсвэр шийдэгдэж Төрийн банкинд шилжсэнийг өнгөрсөн баасан гарагт хийсэн нээлттэй хаалганы үеэр салбарын сайд нь дуулгасан. Өнөөдрийн байдлаар энэхүү ажлын явц хэр байгаа талаар Орон сууц санхүүжилтын корпорацийн  зээлийн мэргэжилтэн н.Дэлгэрмаагаас тодрууллаа.

-“100 мянган айл орон сууц” хөтөлбөрийн хүрээнд нийт хэчнээн иргэн материалаа ирүүлээд байна вэ?
-Өнгөрсөн баасан гарагийн байдлаар манайд нийт 1361 иргэн материалаа ирүүлсэн байна. Үүнээс 46 иргэний 1.8 тэрбум төгрөгийн зээлийн асуудал шийдэгдэж иргэд байрандаа ороход бэлэн болоод байна. Мөн 60 гаруй иргэн гэрээ байгуулах шатандаа материалаа бүрдүүлээд явж байгаа.

 -Иргэд ихэвчлэн хэдэн метр квадраттай байрны сонголт хийж байна?
-Ер нь 28-55 метр квадрат. Өөрсдийн нөхцөл бололцоондоо зохицуулаад байраа сонгож байгаа. 

 
-Хөдөө орон нутгийн иргэд “100 мянган айлын орон сууц” хөтөлбөрт хамрагдах хүсэлтээ ирүүлж байна уу?
-Орон нутгийн иргэд сүүлийн үед нэлээд сонирхож материалаа ирүүлж байгаа.

-Зээлдэгчийн сард төлөх зээл, хүүгийн нийт төлбөр нь тухайн өрхийн орлогын 45 хувиас хэтрэхгүй байна гэдэг заалт байгаа. Тэгэхээр өрхийн орлого заавал 780 мянган төгрөг байх шаардлагатай юу?
-“100 мянган айл орон сууц” хөтөлбөр бол бага дунд орлоготой иргэдийг байртай болгоход чиглэгдсэн. Тухайн айл 30 сая төгрөгийн зээл авлаа гэхэд өрхийн сарын орлого нь 600 мянга орчим байхад л болно. Харин 20 жилийн хугацаатай 50 сая төгрөгийн байр авсан бол сарын орлого нь 780 мянга байх гэсэн шаардлагыг тавьж байгаа.

-Иргэдийн өргөдлийг хэдий хэр хугацаанд шийдэж өгч байна вэ?
-Манай дээр ирсэн материал маргааш нь гэхэд банк  руу шилжчихдэг. Иргэд материалаа дутуу дулимаг бүрдүүлсэнээс цаг алдах асуудал гарч байгаа.

-Байрны үнийн хувьд хэдэн төгрөг байх шиг байна. Хөтөлбөр хэрэгжиж эхэлсэнээс хойш үнэ өсөөд байгаа гэсэн мэдээлэл байна л даа?
-Байршлаасаа л шалтгаалдаг. Хотын зах руу бол нэг метр квадрат нь 900 мянгаас дээш, хотын төв рүүгээ бол нэг метр квадрат сая 400 мянгаас эхэлж байх жишээтэй.

                                                                                                                                                  П.УНДРАМ info.mn