Монгол Улсын Их Хурлын 2010 оны 36 дугаар тогтоолоор батлагдсан “Шинэ бүтээн байгуулалт” дунд хугацааны зорилтот хөтөлбөр болон Улаанбаатар хотыг хөгжүүлэх ерөнхий төлөвлөгөөний дагуу гэр хорооллыг инженерийн бүрэн хангамжтай жижиг сууцны хороолол болгон хөгжүүлэх ерөнхий төлөвлөгөөг бодит ажил хэрэг болгох, нөхцөл боломж нь ямар байгааг хэлэлцлээ. Энэхүү хуралдаанаар “Дунд хэсгийн буюу төвлөрсөн болон бие даасан инженерийн хангамж бүхий тохилог хувийн орон сууцны бүс дэх жишиг сууцны загвар төсөл”-ийг танилцуулсан юм.

   Төслийн гол зорилго нь гэр хорооллын газрыг иргэдийн оролцоотойгоор шинэчлэн сайжруулах, иргэдийн амьдрах орчинг сайжруулахад оршиж байгаа юм. Төсөлд тусгагдсанаар тухайн иргэний гэр бүлийн хэрэгцээн дэх 0.07 га талбайд төлөвлөлт хийхдээ нэг өрхийг 4-6 ам бүлтэй байхаар тооцоолон, 9.0м х 9.0м харьцаатай 2 давхар амины орон сууц, гражнаас гадна өрхийн хэрэгцээг хангах ногооны талбай, хүлэмж, явган зам талбай, ногоон байгууламж зэргийг төлөвлөсөн нь газрыг зөв зохистой ашиглаж, эрүүл, тохилог орчинд ажиллаж амьдрах нөхцлийг бүрдүүлэх, өрхийн аж ахуй эрхлэлтийг нэмэгдүүлэх үр өгөөжтэй төсөл хөтөлбөр болно гэж үзэж байгаа юм.

   Энэ хөтөлбөрийн инженер, дулаан хангамжийн шийдэл, төсөвт өртгийн талаар дэлгэрэнгүй мэдээллийг Хангарьд ордны 11 давхарт байрлах Барилга, Хот байгуулалт, Төлөвлөлтийн газраас авч болох юм.