“Бетоны талбайн техникчийн 1-р зэрэг”-ийн сертификат олгох Олон Улсын Сургалт амжилттай зохион байгуулагдлаа
ШУТИС Дарханы Технологийн Сургууль, Америкийн Бетоны институттэй хамтарсан “Бетоны талбайн техникчийн 1-р зэрэг” олгох олон улсын сертификат бүхий сургалт нь 2012 оны 4-р сарын 20-ноос 07-р сарын 5 ны хооронд нийт 70 цаг хичээллэж амжилттай зохион байгуулагдлаа.
Уг сургалтанд шинээр бэлтгэсэн бетон зуурмагаас хэрхэн дээж авч сорьц бэлтгэх, бетоны чанарын үзүүлэлтүүдийг турших болон бетоныг арчлах стандарт аргачлалуудын талаар заасан бөгөөд сургалт танхимд болон талбай дээр туршилт хийх хэлбэрээр явагдсан юм. Сургалт нь олон улсын хэмжээнд хүлээн зөвшөөрөгдсөн сертификат олгох зорилготой байсан тул суралцагсдын мэргэжлийн чадвар чансааг дээшлүүлэх төдийгүй мэргэжлийн англи хэлний мэдлэгийг дээшлүүлж зохих түвшинд хүргэж чадсанаараа давуу талтай боллоо.
Олон улсын хэмжээнд хүлээн зөвшөөрөгдсөн сертификат олгох шалгалтыг Америкийн Бетоны институтийн доктор, профессор M.R Hansen ирж авлаа. Шалгалтанд нийт 27 инженер техникийн ажилтнууд болон төгсөх ангийн оюутнууд хамрагдсан байна. Дараагийн сургалт нь зөвхөн Улаанбаатар хот төдийгүй хөдөө орон нутагт зохион байгуулагдахаар болсон юм.