Манай үйлдвэр нь анх 1983 онд сууриа тавьснаас хойш тоног төхөөрөмжүүд 30 аад жил тасралтгүй ажиллаж байна. Элэгдэж хорогдохгүй эд анги гэж байхгүй бүгд л элэгдэл хорогдолд ордог. Хоорондоо харьцдаг эд ангиуд болох төрөл бүрийн араанууд, шүдэт муфта, катки, холхивч, бутлуурын алх, плита шүүр, түүхий эдийн, цементийн, нүүрсний тээрмийн хуяг, доторлогоо зэрэг эд ангиуд хамгийн их элэгдэлттэй байдаг.Тоног төхөөрөмжүүд бүгд элэгдлийн нормтой. Манай инженер механикууд өөрийн хариуцаж байгаа тоног төхөөрөмжийнхөө элэгдэл хорогдолыг нормын дагуу тооцож урьдчилан сэргийлэх засвар, техникийн үйлчилгээ, дунд болон их засваруудыг график төлөвлөгөө гарган батлуулж эдгээр засвар үйлчилгээнүүдийг цаг хугацаанд нь хийж ирлээ. Ингэснээр тоног төхөөрөмжүүдийн эд ангиудыг хугацаанаас нь өмнө элэгдэж хорогдохоос урьдчилан сэргийлж ажиллаж байна.

      Энэ тал дээр бид тодорхой чиг бодлого барьж ажилладаг. Тоног төхөөрөмжийг хуучирч муудлаа гээд ашиглахгүй орхих биш засаж сэлбээд цаашид ашиглах нь бидний гол зорилго. Одоо бол эдгээр сэлбэг хэрэгслэлүүдийн олдоц үнэхээр муу олдохгүй зарим нэг нь үйлдвэрлэгдэхээ больсон . Бид Засварын Нэгдсэн Цехийн хүчин чадал, дотоод нөөц бололцоондоо тулгуурлан нийт хэрэгцээт сэлбэг эд ангийн 50-60%-ийг үйлдвэрлэж байна. Энэ бүхэнд манай Инженер Техникийн Ажилтан нарын мэдлэг чадвар их орж байгаа.    Жишээ нь: 1990-ээд оны эхээр зогссон технологийн 1-р шугмыг сэргээн босгож ажилд оруулхаар 2008 оны 4-р сараас 9-р сар хүртлэх хугацаанд үйлдвэрийн цех тасгуудаас ажлын туршлагатай 3 Инженер Техникийн Ажилтан, 19 засварчин, гагнуурчдыг татан авч бригад зохион байгуулан ажиллаж өөрсдийн хүчээр бүрэн ажилд оруулсан. Энэ ажлыг амжилттай хийснээр 2009 оноос хойш цемент үйлдвэрлэлийн хэмжээ жил тутам өссөн үзүүлэлттэй байна.

    Одоо манай цех хэсгүүд бүгд тоног төхөөрөмжийн засвар үйлчилгээг хариуцсан механик, засварчид, гагнуурчдаас бүрдсэн засварын бригадтай. Засварын Нэгдсэн Цехийн харъяанд 15 хүний бүрэлдэхүүнтэй механикийн хэсэг , 18 хүний бүрэлдэхүүнтэй засварын хэсэг ажиллаж шаардлагатай сэлбэг эд ангийг үйлдвэрлэх болон шаардлагатай  цех хэсгүүдэд очиж засварын ажлыг хийж байна.Томоохон засварын ажилд үйлдвэрийн бүх цех нэгжүүдээс Инженер Техникийн Ажилтан, засварчид, гагнуурчдыг дайчлан оролцуулж богино хугацаанд  хийж гүйцэтгэх, зохион байгуулалтын арга хэмжээг цаг тухайд нь авч ажилладаг. Инженер Техникийн Ажилтан нарын мэдлэг мэргэжлийг дээшлүүлэх зорилгоор жил болгон тодорхой чиглэлээр сургалтанд хамруулж ирсэн. Удахгүй Инженер Техникийн Ажилтан нарыг сургалтанд сургахаар төлөвлөгөө гарган ажиллаж байна. Өөрийн үйлдвэрийн харилцах байгууллагууд болох Эрдэнэтийн ГОК , Дарханы ТЭЦ , Дарханы “ Геомаш” зэрэг үйлдвэрийн газруудад төлөвлөгөөний дагуу механикуудыг явуулж туршлага судлуулсан.

    Үйлдвэр маань ашиглалтанд ороод 29 дэх жилдээ ажиллаж байна. Энэ хугацаанд техникийн дорвитой шинэчлэл хийгдэж байгаагүй. Сүүлийн жилүүдэд үйлдвэрлэлийн хэмжээ нэмэгдэж ашиг орлого нэмэгдсэнээр техникийн зарим нэг шинэчлэл хийж ирлээ. Үүнд: Авто Машин Механизмын Баазад хүнд даацын автомашин, бульдозер, эксковатор, өрмийн машин, автокран авч парк шинэчлэл хийсэн. Компрессорын цехэд 2 ш компрессор шинээр суурилуулан туршиж ажилд хүлээн аваад байна. Зуух, тээрэм цехүүдийн их засварын ажлыг төлөвлөсний дагуу хийж Цементийн Тээрэм, Түүхий Эдийн Тээрэм, Нүүрсний Тээрмийн хуяг бронийг 100% шинэчлэн сольсон, мөн шохойн цехэд 0-40 мм шохой бутлах иж бүрэн бутлуур, дамжлага, бункерийн систем ажилд оруулсан.Тээрэм цехийн грейфер краны зам рельс 300 м шинээр солив.

      Хуурай аргын технологийн шинэ шугам барьж байгаатай холбогдуулан бидний одоо хэрэглэж байгаа нойтон аргын үйлдвэрийнхээс өөр тоног төхөөрөмж нилээн хэд суурилагдах гэж байна. Үүнд: 700 т/ц-ийн хүчин чадалтай 2 роторт алхан бутлуур, 210 т/ц-ийн хүчин чадалтай босоо булт тээрэм, циклонт дулаан солилцуулагч, кальцинатор, цахилгаан болон ханцуйт фильтрүүд, түүхий эд нүүрсийг дундажлан нуруулдаж хураах складгэх мэт. Одоогийн байдлаар тоног төхөөрөмжүүд бүрэн үйлдвэрлэгдэж, нийт 330 –аад вагон ачаа тоног төхөөрөмж ирснийг буулган хурааж аваад байна. Энэ ажлын хүрээнд хуурай аргын үйлдвэрийн зураг төслийн бичиг баримтыг монгол хэлэнд хөрвүүлэх , хийж байгаа ажлуудыг фото зургаар баримтжуулах , шинэ хуучин хоёр шугамыг холбох талаар төсөл зохиогчтой хамтран ажиллаж холбогдох тодотголуудыг хийсэн.

Цаашдын зорилт гэвэл:

    1-рт одоо ажиллаж байгаа нойтон аргын шугамын төлөвлөгдөж байгаа засваруудыг чанартай хийж энэ жилийн төлөвлөгөөт зорилтыг биелүүлэх.

   2-рт хуурай аргын үйлдвэрийн угсралт тоног төхөөрөмжийн суурилуулалтын ажилд хяналт тавьж чанартай хийлгэх, одоо байгаа цех нэгжүүдэд хамаарах тоног төхөөрөмүүдийн угсралтанд залуу Инженер Техникийн Ажилтануудыг эхнээс нь дагалдуулан ажиллуулах ба урьдчилсан онолын сургалтанд хамрагдсан Инженер Техникийн Ажилтан болон механикуудыг хамруулан цаашид БНХАУ-ын аль нэг үйлдвэр дээр сургалт дадлагад хамруулах чиглэлтэй ажиллаж байна.