Энэ дэлхийн дизайнерууд этгээд сонин тавилга зохиох нь олонтаа. Тэрний зарим нь амьтан хамгаалагчдын дургүйцлийг төрүүлж мэдэхээр бол зарим нь өнөөгийн залуусын эрэлт хэрэгцээг бодолцсон байх жишээний. Тэгвэл овсгоотой нэг нь автомашин, техник сонирхогчдын сэтгэл зүй, сонирхолд бүтээлээ тохируулан хийдэг бол бүр нөгөө хэсэг нь этгээд гаж зүйлд дуртай нэгэнд анхаарлаа хандуулна.
Бид энэ удаад этгээд бөгөөд сонин зарим тавилгыг танилцуулахаар бэлтгэлээ. Энэ бүхэн мэдээж их хөгжилтэй бөгөөд сонин. Мөн мэдээж бид гэртээ тавиарай гэж зөвлөхгүй.
Хонь, ямаа унахыг хүсдэг хүмүүст зориулсан сандал
Амьд амьтан дээр сандайлж буй мэт сэтгэгдлийг төрүүлэх эдгээр сандлууд уян турьхан хөл дээрээ 115 кг жинтэй хүнийг өлхөн даана гэж тайлбарт нь өгүүлжээ. Зузаан зөөлөн үс, тансаг хилэн мэт зөөлөн хамар, аядуу зөөлөн харцтай нүдийг нь хараарай. Хэдийгээр сандал ч гэлээ өөдөөс нь харахад яг л бэлчээрээсээ дөнгөж ирсэн мэт л санагдана гэжээ. Мэдээж толгой, хөл зэрэг тулгууруудыг ган төмрөөр хийсэн бөгөөд амьд мэт харагдуулахын тулд нэлээд их зүйлийг хийжээ. Суухад тун тохиромжтой гэдэг нь хараваас тодорхой байгаа биз.
Машины суудал уу, буйдан уу
Тансаг машин сонирхдог хэн байлаа ч түүн дотроо амьдарч болохгүй шүү дээ. Гэхдээ өөрийн хайртай машин дотроо байгаа мэт сэтгэгдлийг төрүүлэх аргыг зарим дизайнер олжээ. Тэрхүү машины арын суудал танд ямар санагдаж байна. Мэдээж 1980-аад оны хоцрогдсон загварынхтай адилгүй харагдаж байгаа биз дээ. Тун ч тааламжтай, тансаг зэрэглэлийнх биш гэж үү?
Aston Martin DB6- алдарт Жеймс Бондын машиныхтай адил. Түүн дээр тухтайхан суугаад киногоо үзээд шарсан төмсөө иднэ гээд төсөөл дөө.
Давалгаатай зүйрлэм “сүйх тэрэг”
Өсвөр насныхан дотроос энэ ор ч болдог, чухам хүссэнээрээ ашиглаж болох энэ орыг таашаахгүй хүн байхгүй гэж маргахад ч бэлэн байна. Тэдний насныханд интертайнмент орчин бүхнээс чухал. Телевиз, киногоо үзэх, видео тоглоом тоглох, гэрийн даалгавраа хийх, CD-гээ сонсох, номоо уншихад нь энэ орчин хамгийн тохиромжтой. Мэдээж утсаар ярих, мессэж бичиж хэвтэхэд энд хэн ч түүнд саад болохгүй. Хэсэг зуур ч гэсэн нойроо авахад энэ этгээд чамин хамгаалалтын бүс тусаа өгөх нь дамжиггүй.
Хана руу авирсан буйдан
Та бүхэн ийм буйдан өмнө нь харж байсан уу. Хана руу авирсан хэсгийг газарт буулгавал овоо хэдэн хүн багтаад суучихмаар санагдаж байгаа байх. Тэгвэл Лила Жангийн бүтээсэн энэхүү буйданг өөр ямар нэг зүйл тавих боломжгүй буланг тааруулан тавихад тохиромжтой гэж тайлбарт нь өгүүлсэн байх юм. Дээрх буйданг Парист зохиогдсон орчин цагийн урлагийн музейд тавин үзэгчдийн хүртээл болгож байжээ.
Цайны ширээ, дараа нь ор
Торонтогийн Julia West Home-ийнхон тавилгын шийдэлд үргэлж шинэчлэл хийсээр иржээ. Эхний зургийг хараарай. Зүгээр л цайны ширээ байгаа биз дээ. Ирсэн зочиддоо цай, идээгээ тавин зочилоход тун тохиромжтой. Гэхдээ энэхүү ширээг бас өөр зориулалтаар ашиглаж болно. Ширээний тавцан хэсгийг дэлгэн нээвэл дотроос нь зөөлөн матраас гарч ирнэ. Түүнийг хойш нь дэлгээд л ор болж байгааг удаах зургаас харж байгаа байх. Ингээд л ирсэн зочноо унтуулах орны асуудал шийдэгдчихлээ. Нэг сумаар хоёр туулай буудах гэдэг шиг ор, ширээний асуудлыг хамтад нь шийдэхээс гадна, зай багатай орон сууцанд үнэхээр тохиромжтой энэ тавилгын үнэ тийм ч үнэтэй биш гэж танилцуулгад нь дурдсан байсан.
Бүсгүй хүний өвөр дээр суумаар байна уу
Тэгвэл энэ сандал таны сонирхлыг татах нь гарцаагүй. Түшлэг нь бүсгүйн хөл гээд төсөөл дөө. Мэдээж энэ сандлын талаар илүү тайлбар шаардлагагүй байх.
