Хэнтий аймгийн ардын дуу бүжгийн “Хан Хэнтий” чуулгын шинэ барилгын суурийн газар шорооны ажлыг гүйцэтгэж байгаа “Хөвсгөл геологи” компанийн барилгачид нэгэн өвөрмөц амьтны ясыг дөрвөн метрийн гүнээс олж, орон нутгийн зохих байгууллагуудад мэдэгдлээ.
       6 сарын 14-ний орой барилгын ажилчид газар ухаж байх үед ямар нэгэн амьтны том хэмжээтэй яснууд нэг газарт бөөнөөрөө олджээ. Тухайн үед мэргэжлийн хүн байгаагүй учир барилгачид яснуудыг гараар ухаж ил гаргасан байна. Одоогоор аймгийн Мэргэжлийн хяналтын газар, музейн холбогдох мэргэжилтнүүд очиж танилцан олдвор олдсон газрын ажлыг хэсэгчлэн зогсоож, олдворыг аймгийн музейд хадгалж байгаа ба Боловсрол соёл шинжлэх ухааны яаманд уг олдворыг нягтлан үзэх ажлын баг ирүүлэх хүсэлт тавьжээ. Хэнтий аймгийн нутгаас олдсон эртний хирс гэдэг амьтны ястай төстэй байна гэж аймгийн музейн ажилтнууд таамаглаж байна.

Эх сурвалж: Хэнтий аймгийн хэвлэл мэдээллийн алба