Монголд анх удаа зохион байгуулагдаж буй “Mining Mongolia-2012 ” олон улсын уул уурхай, барилгын үзэсгэлэн  Буянт-Ухаа спортын цогцолборт нээлтээ хийлээ. Үзэсгэлэнг “Allworld Exhibitions” групп, Уул уурхайн яам, Зам тээврийн яам,  Барилга, хот байгуулалтын яам, Худалдаа аж үйлдвэрийн танхимтай хамтран зохион байгуулсан юм.

       Нийт 24 орны 200 гаран байгууллагууд оролцож байгаа бөгөөд уг үзэсгэлэнд дэлхийн  шинэ, шилдэг техник технологи танилцуулагдлаа. Тус үзэсгэлэнд барилга хот байгуулалтын сайд Ц. Баярсайхан нээж үг хэллээ.  Манай улсад эрчимтэй хөгжиж байгаа уул уурхай, барилгын салбарын хувьд тус үзэсгэлэн ихээхэн ач холбогдолтой гэж албаныхан онцоллоо.

“Mining Mongolia-2012 ”  үзэсгэлэн есдүгээр сарын 7-ныг хүртэл үргэлжлэх юм. Үзэсгэлэнгийн өдрүүдэд томоохон бүтээн байгуулалтын явцыг харуулсан баримтат кино, амжилттай ажиллах туршлагуудаасаа хуваалцах гээд цөөнгүй  хөтөлбөрийг  зохион байгуулах юм байна.

Үзэсгэлэнгийн үеэр  зохион байгуулах хорооны дарга Т.Баттулгатай уулзаж ярилцлаа.

-Үзэсгэлэн амжилттай нээлтээ хийлээ. Тус үзэсгэлэгийн ач холбогдлын талаар сэтгэгдлээ хуваалцана уу?

“Mining Mongolia-2012 ”   олон улсын уул уурхай, зам, барилгын үзэсгэлэн анх удаагаа зохион байгуулагдаж байна. 24 орны 200 гаран компани оролцож байна гэдэг утгаараа томоохон арга хэмжээ болж байна. Гадны шинэ, шилдэг технологийг монголд оруулж ирж байгаа гэсэн утгаараа тус  салбарынханд их ач холбогдолтой гэж үзэж байгаа. Хариуцлагатай уул уурхай, байгаль орчинд ээлтэй уул уурхай гэж их ярьдаг болсон. Яг үүнд тохирох шинэ технологууд танилцуулагдаж байна. Монголын уул уурхай, барилгын салбарынхан  энэ өдрүүдэд хүрэлцэн ирж, шилдэг шинэ технологитой танилцан, гадаадын шилдэг компаниудтай бизнесийн харилцаа холбоо, гэрээ хэлэлцээр хийж амжилттай ажиллах бүрэн боломжтой.
-Цаашдаа энэ үзэсгэлэн жил болгон зохион байгуулагдах уу?

 -Бид үзэсгэлэнгээ жил гарны өмнөөс бэлдсэн. Үзэсгэлэн маань амжилттай нээгдлээ. Нар гараад байгаль дэлхий хүртэл тэнүүн байгаа нь таатай санагдаж байна. Бид энэ үзэсгэлэнг жил болгон зохион байгуулж, улам бүр үр дүнтэй, ач холбогдолтой болгохын тулд хичээж ажиллах болно.
- Үзэсгэлэн дотоодын компаниудад нилээдгүй ач тусаа өгөх байх гэж ойлгож байна. Үзэсгэлэнгийн үеэр ямар ямар үйл ажиллагаа зохион байгуулагдах вэ?

- Нийт 200 гаран компаний  150 гаруй компани нь монголд анх удаа ирж оролцож байна. Тэдгээр компаниуд бүгд л үйл ажиллагаа, амжилт бүтээн байгуулалтаасаа хуваалцах юм. Энэ нь дотоодын компаниудад томоохон боломж нээгдэж байна гэж ойлгож болно. Бид гадагшаа явж зардал мөнгө үрэх хэрэггүй. Монголдоо  дэлхийн дэвшилтэт технологтой танилцаж, хамтран ажиллах боломжийг бүрдүүлж байна. Үзэсгэлэнд чадварлаг мэргэжилтнүүд чанартай төхөөрөмжүүд нэг дор цугларлаа. Та бүхэн ирж сонирхоорой гэж хэлэх байна.