Улс орны тэргүүлэх салбаруудыг тодорхойлж, зээл тусламж, экспорт импортын асуудлыг шийдэх зорилготойгоор ажиллаж байгаа Эдийн Засгийн Хөгжлийн сайд Н.Батбаяр улс орны өнгө төрх хөгжил дэвшлийг илэрхийлж байдаг барилгын салбарын төлөөлөлүүдийг хүлээн авч уулзлаа.

 

      Уулзалтын эхэнд ЭЗХЯ-аас хийж хэрэгжүүлж байгаа ажлаа танилцуулсан юм. Энэхүү уулзалтын гол зорилго нь барилгын салбарын хөгжлийг хурдасгахад ЭЗХЯ-аас ямар ажлыг хийж хэрэгжүүлж байгаагаа танилцуулах мөн ачааны хүндийг нуруундаа үүрч яваа барилгын компаниудын өмнө тулгараад байгаа асуудлуудыг сонсох, үүнийг нь бодлогын түвшинд авч хэлэлцэх зорилготой зохион байгуулсан байна.

 

      Эдийн Засгийн Хөгжлийн сайд өөрөө 2004 онд БХБЯ-ны /ЗТБХБЯ/ сайд байсан учраас компаниудын бэрхшээлүүдийн тухай арай илүү мэдэх ёстой. Барилгын компаниудад тулгардаг хамгийн том “бул хар чулуу” нь санхүүжилтын асуудал байдаг. Энэхүү уулзалтан дээр ч “нөгөө л нэг” гэдэг шиг санхүүжилтийн асуудал яригдсан юм.

 

      Тиймээс гаалийн нэмүү өртөгийн албан татвар болон Замын-Үүдийн ачааны бөөгнөрөл, нэвтрүүлэх чадварыг нэмэгдүүлэх, үнийн асуудлыг нэн тэргүүнд шийдвэрлэх хэрэгтэй байгааг онцлоод “Хийж чадах юм бол санхүүжилтийн асуудлыг шийдэж өгөхөд бэлэн” байгаагаа гэлээ. Мөн арилжааны банкуудын зээлийн хүүг нэг оронтой тоонд оруулах, урт хугацаатай зээлийг хэрхэн бий болгох талаар анхааран ажиллаж байгаа гэнэ.