Аливаа юманд арга олддог гэдгийн бодит жишээг саяхан олж харлаа.

    НИТХ-аас барилга эхлүүлэх зөвшөөрөл олгохыг зогсоосноос хойш  хотын төвд шинэ барилга баригдахаа больсон билээ. Гэвч барилгын компаниуд нэг гарц олсон бололтой.

    Учир нь Гандангийн хорооллууд дэд бүтэцдээ ойрхон, хотын төвд учраас барилгын компаниуд  Гандангийн айлуудтай хувьчилсан гэрээ хийж, хотхон барьж эхэллээ.  “Эх нялхас”-ын хажуугийн гэр хороололд  10 гаруй давхар сүрлэг хотхон эхнээсээ босч эхэллээ. Дөрвөөс таван айлын хашааг худалдан авч, нэг барилгыг барьж байх жишээтэй.

     Хот төлөвлөлт замбараагаа алдаж,   машин явах нь битгий хэл алхах гишгэх зайгүй болсон гэж олон хүн шүүмжлээд байгаа.

    Энэ нөхцөлд дээрх компаниудын үйл ажиллагаагаа явуулж байгаа арга барил  зөв зүйтэй гэж хэлж болохоор л юм. Үнэхээр л хотын “А” бүсэд газар олгохгүй гэсэн шийдвэр гарснаас хойш ингэж л ажиллахаас ч өөр яах билээ. 

   Барилгын компаниуд  үүнээс санаа авч ажиллаж, тухайн айлуудтай нь тохирч, бүтээн байгуулалтыг ийм аргаар явуулбал гэр хорооллыг барилгажуулна гээд яриад байдаг нь хэзээ нэгэн цагт биелэлээ олох ч байж мэднэ.  

   Инженерийн шугам сүлжээ ойрхон ч хөрсний бохирдол дээд цэгтээ хүрсэн Гандангийн гэр хороолол ийнхүү эхнээсээ барилгажиж эхэллээ.