70 гаруй жилийн түүх, туршлагатай  “Улаанбаатар барилга” компани “Нарны гүүр” хэмээх томоохон бүтээн байгуулалтыг Япончуудтай хамтран хоёр жил гаруй хугацаанд амжилттай хийж гүйцэтгэсэн.

Эх нялхас, Ард , Ялалт кино театр гээд тэртээх үеэс одоо хүртэл хөдөө хотгүй нийтдээ 1600 орчим  бүтээн байгуулалт хийсэн “Улаанбаатар барилга” компани өдгөө улам өргөжиж, мэдлэг чадвартай шинэ залуу инженерүүдээр хүрээгээ тэлж бүтээн босгохоос гадна чанарын өндөр түвшинд бетонон  хана, хавтан, ус зайлуулах хоолой гэх мэт олон бүтээгдэхүүнийг үйлдвэрлэдэг монголын тэргүүлэх компаниудын нэг билээ.

Ингээд Улаанбаатар компаний ерөнхий захирал Монгол Улсын гавьяат барилгачин Б.Жүгдэр гуайтай уулзаж “Нарны гүүр”-ийн бүтээн босголтын талаар хэдэн хором ярилцснаа хүргэе.

 
Япон Монголын хамтарсан “Нарны гүүр” ашиглалтад ороод удаагүй байгаа ч  иргэд ихээхэн ам сайтай байна. “Нарны гүүр”-ийн  ажил хэзээнээс эхэлсэн юм бэ?

Япон  Улсын  буцалтгүй тусламжаар Монгол, Японы  засгийн газрын хоорондын  хэлэлцээрийн дагуу, Улаанбаатар хотын дэд бүтцийг сайжруулахад зориулагдсан  томоохон бүтээн байгуулалт бослоо.  Тус гүүр Баянгол, Сүхбаатар дүүргийн нутаг дэвсгэр дээр байрладаг. Хойноосоо урагшаа Хан-Уул дүүрэг рүү холбогдож байгаа тус гүүр нийтдээ  895 м  урттай.  Японы буцалтгүй тусламжаар баригдаж байгаа учраас тэндээ тендэр шалгаруулсан.

Металл хийцийн ажлаараа тэргүүлдэг  Японы “JFE” компани  шалгарсан.  2009 оны сүүлээр Японоос хүмүүс  ирж, дотоодод тендэр шалгаруулахад манай компани гүүрний төмөр бетонон эдлэл, гүүрний үндсэн хэсгийг хийх болсон. Монгол талаас “Улаанбаатар барилга, Ялгуулсан, Гэгээн цайдам гэх мэт компаниуд хамтарч ажилласан. Гүүрний үндсэн ажил  2010 оны 3 сараас эхэлж, 2012  оны 11-сарын 15 -нд дуусах гэрээтэй байсан ч бид нэг сарын өмнө хүлээлгэн өглөө.

Гүүр барихад нийтдээ хэдэн хүн ажилласан бэ?

-Оргил үедээ 300 орчим хүн ажиллаж байлаа. Ерөнхий удирдлага Япон инженерүүдийн гарт байсан ч монголын барилгачдын хувь нэмэр асар их. Улаанбаатар компаниас л гэхэд 200 аад хүн ажилласан. Япон нөхдүүдээс суралцах зүйл их байлаа. Тэдний ажлаа явуулах зарчим их таалагдсан. Маш нарийвчилсан төлөвлөгөөтэй ажилладаг.

Нарны гүүр  ашиглалтад орсноос хойш замын түгжрэл багагүй хувиар буурсан гэж байгаа.  Нийслэлд маань  дэлхийн жишигт нийцсэн бүтээн байгуулалт нэгээр нэмэгдлээ шүү дээ...

Нарны гүүр  чанарын өндөр түвшинд, шилдэг шинэ технологиор хийгдлээ. Улсын комисс  сайн үнэлгээтэйгээр  хүлээн авсан.  Гүүр ашиглалтад орсноор “Энхтайвны гүүр”-ний ачааллыг 25-30 хувиар багассан гэж сонссон.  Хоногт  30,000 тээврийн хэрэгсэл зорчих хүчин чадалтай.

-Японууд гүүрний баталгаат хугацааг 100 жилээр өгсөн гэж сонссон. Энэ үнэн үү?
Японууд аливаа зүйлийн орц найрлагад их анхаардаг хүмүүс. Тиймдээ ч гүүрний материал бүрийг нарийн шинжилж, элс хайрга бүрийг  лабораторийн  шинжилгээнд хамруулсан.

Нарны гүүрийг 25 жилдээ засвар хийх шаардлагагүй, цаашлаад 100 жил ашиглах боломжтой гэж тооцоолсон.   

Япон инженерүүдээс суралцах зүйл их байв уу. Дэлхийн шинэ, шилдэг технологиудыг суралцаад үлдэнэ гэдэг маш том олз шүү дээ?
Ерөнхий зохион байгуулалт, удирдлага Япон инженерүүдийн гарт байсан. Япопчууд зөвлөх үйлчилгээг үнэхээр төгс байдлаар хэрэгжүүлдэг юм байна лээ.

Ажлын төлөвлөгөөгөө өдөр өдрөөр нарийвчлан гаргадаг. Өдөр өдөрт нь хянаж шалгадаг нь ажил чанартай, үр бүтээмжтэй байхад нөлөөлдөг юм билээ.  Эдгээр зан чанараас нь суралцаж үлдсэндээ баяртай байна.

Нарны гүүрийг хоёр жил гаруй хугацаанд бүтээн босгосон. Энэ хугацаанд зам харгуй хааж, бусад үйл ажиллагаанд нөлөөлөлгүй, хөдөлмөрийн аюулгүй түвшинд ажилласан гэж үзсэн. Энэ тал дээр та юу хэлэх вэ?  
 300 аад хүн ажиллаж, хүнд машин механизмаар ажил хэргээ явуулсан ч ямар нэгэн осол гэмтэл гараагүй. Маш нарийн зохион байгуулалттай, хөдөлмөрийн аюулгүй байдлыг чанд сахин ажилласан.

Мөн гүүр баригдах хугацаанд нарны замын хөдөлгөөн, гүүрний доорх  вагоны  зам хэвийн ажилласан. Бид өрөмдөж цутгалт хийх маягаар хийж гүйцэтгэсэн нь  шинэ технологи, шинэ аргачлал байж чадсан.

Гүүрийн  бетонон цутгалтын ажлыг “Улаанбаатар барилга” компани хийж гүйцэтгэсэн гэж сонссон. Цутгалтын тал дээр ч гэсэн шинэ технологиудыг авч хэрэгжүүлсэн үү?
Дээр хэлсэнчилэн бүх орц материалуудыг  нь шилж, сонгож шинжилгээнд хамруулсан.   Гүүрний хаалт, хавтан бол дэлхийн  хамгийн сүүлийн үеийн  технологиор хийгдсэн. Ерөнхий цутгалтыг манай компани хийж гүйцэтгэсэн.

Танай компани цаашдаа монголын томоохон бүтээн байгуулалтыг дангаараа хийж гүйцэтгэх дадлага туршлагатай боллоо. Гар бие оролцсон “Нарны гүүр”-ийг хараад  сайхан сэтгэгдэл төрнө биз?

Барилгачин хүний жаргал бол бүтээж босгосноо харах байдаг. Нарны гүүр бол үнэхээр томоохон бүтээн байгуулалт. Харах бүр сайхан сэтгэгдэл төрдөг

                                                                                                                                                       Л.Мөнхчимэг