Ярилцаад суухад тэр хүнийг хэн болохыг өчүүхэн ч гэсэн таньж болно гэж би хувьдаа боддог. Энгийн нэгэн барилгачин залуу Ө. Баасанбаттай ярилцахад  мөрөөдөл нь, санаж бодож байгаа зүйл гэгээлэг бүхнийг бодогдуулж байлаа. Арван хэдхэн наснаасаа хойш барилгад үнэнч байсан тэрбээр барилгын салбарын тэргүүлэх ажилтан болохын тулд хичээнгүйлэн ажиллаж байна.

Барилгын салбарт хэдэн жил ажиллаж байна вэ?

Барилгын  салбарт  11 дэхь жилдээ  ажиллаж байна. Гадна, дотно засал хийнэ, пилта наана, мөн бага саг мужааны ажил хийдэг.

Барилгад олон  жил ажилласан юм байна. Байртай болж амжсан уу?

     Байртай болж амжаагүй л байна. Хэдэн жилийн өмнө 300 мянган төгрөгний цалин аваад  болоод л байдаг байсан. Одоо сард  1 сая төгрөгний цалин авч байгаа хэдий ч хурааж хуримтлуулж чадахгүй юм. Гэхдээ би байрнаас илүү амины сууцыг илүүд үздэг хотоос зайдуу аятайхан байшин барих санаа байгаа.

  Таньд боломж нь байгаад, нөхцөл нь бүрдэх юм бол мөрөөдлийн байшингаа өөрөө босгочих л юм байна тэ?

    Өө тэгэлгүй яахав. 10 гаруй жил барилгын компанид ажилласан хүний хувьд дотроо төсөөлсөн байшингаа жинхэнэ бодитоор босгоно шүү дээ.

Одоо та хаана, хэдүүлээ амьдардаг вэ?

   Яармагт эхнэр, хоёр хүүхдийнхээ  хамт  монгол гэрт  амьдардаг.  Барилга дагасандаа би харамсдаггүй ээ.  18- наснаасаа хойш барилгаар л хоолоо олж идсэн.  Яахав  хоёр идэхгүй хоосон хонохгүй болоод л байна. Ер нь тэгээд сайн санаж, сайхан юм бодож явахад болно гэдэг шүү дээ.

  Таны мөрөөдөл юу вэ?

    Би өөрийн гэсэн бригадтай болохыг хүсдэг.  Компаний эрх аваад гар нийлсэн хэдэн хүмүүстэй болчихвол ч амжилттай аваад явчих чадвартай гэж өөрийгөө үнэлдэг.  Тэрнээс сарын цалингаар өнөөдрийг л болгоно уу гэхээс маргаашийг болгож чадахгүй  шүү дээ.  Цаашдаа ч би барилгадаа үнэнч байх учраас энэ салбартаа тэргүүлэгч байж, өөрийн гэсэн бригадтай болохыг л мөрөөдөж байна.

   Монгол залуучууд гадаадруу явж ажиллаж байна. Харин Хятадууд манайд ирж ажиллаж байна. Энэ тал дээр та юу хэлэх вэ?

    Монголын залуусыг залхуу, ажилгүй гэж ярьдаг. Би үүнтэй санал нийлдэггүй. Мундаг залуучууд монголоор дүүрэн байна. Чадалтай нь гадаадад мэргэжил эзэмшээд тэндээ ажиллаж байна. Харин чадалгүй нь  мөрөөдлөө тээгээд, сайхан амьдарчихаад зүтгээд л байна. Манайхан хүүхэд хөгшидөө дээдлэн тэтгэх гэж их ярьдаг. Энэ мэдээж зөв . Гэхдээ амьдралд хөлөө олох гэж тэмтчин яваа залуусдаа урам өгч дэмжих хэрэгтэй болов уу.  Барилга дээр хятад ажилчид их байдаг гэдэг бол үнэн. Би ч бас хятадуудтай ажиллаж байлаа. Гэхдээ монгол залуучуудаас хятадууд илүү гардаггүй. Тэдний нэг өдөр хийх ажлыг монголчууд өдрийн тал л хийдэг.

 Хөдөлмөрийн аюулгүй байдал танай ажил дээр хэр хангагддаг вэ?  

Дажгүй шүү. Каскаа өмсөөд бүрэн бүтэн аюулгүй байдлаа шалгаад л ажилдаа гарна шүү дээ

 Сайхан амьдрахад хамгийн чухал зүйл юу вэ?

Эрүүл байх, Хөдөлмөрлөх

                                                                                                                                                        Л.Мөнхчимэг