Японы Хоккайдогийн барилгачидтай хамтын ажиллагааны эхлэл тавигдлаа
Япон улсын Хоккайдо Мужийн Барилгын Үндэсний Ассоциаци, Барилгын Технологийн Төв болон Монголын барилгын үндэсний ассоциаци (МБҮА) - ийн хооронд барилгын салбарт "технологи хөгжүүлэх" чиглэлээр хамтран ажиллах гурван талт санамж бичигт гарын үсэг зурах хүндэтгэлийн арга хэмжээ Япон Улсын Саппоро хотод 10 сарын 14 - 17 ний өдрүүдэд боллоо. Ийнхүү Монгол Япон орнуудын барилгын салбарын ТББ - уудын хооронд албан ёсны хамтын ажиллагааны эхлэл тавигдлаа.
Хоккайдо муж нь Японы хамгийн хүйтэн сэрүүн уур амьсгалтай нутаг бөгөөд энэ утгаараа тэдний барилгын салбарт олсон ололт, технологийн дэвшил нь Монголд ихээхэн тохиромжтой, нутагшуулах боломжтой гэж үзэж ул суурьтай хамтран ажиллахаар шийдэж 2 талаас жил гаруй хугацаанд 10 орчим удаагийн уулзалт хийж, зохих судалгаануудыг хийсэн юм. Ингээд нэн тэргүүнд дараахь чиглэлээр хамтран ажиллах юм. Үүнд:
1. Барилгын чанар
2. Аюулгүй ажиллагаа, хөдөлмөр хамгаалал
3. Хүйтний улиралд барилга барих хугацааг уртасгах, дэвшилтэт технологи болон тохиромжтой материал нэвтрүүлэх зэрэг болно.
Монголын төлөөлөгчдийг Японд хүлээн авах, Санамж бичигт гарын үсэг зурах болон барилгын компаниудтай уулзалт хийх, туршлага судлах зэрэг айлчлалын туршийн бүхий л арга хэмжээг Японы талаас ихээхэн анхаарал тавьж, өндөр хэмжээнд зохион байгууллаа.
Санамж бичигт Япон улсын Хоккайдо мужийн Барилгын ассоциацийн ерөнхийлөгч Ивата Кейгоо, Барилгын технологийн төвийн захирал Мияаки Коүжи, МБҮА - ийн Дэд ерөнхийлөгч Ц. Эрдэнэчулуун нар санамж бичигт гарын үсэг зурж, тухайн арга хэмжээний талаар Хоккайдо мужийн өдөр тутмын сонин, телевиз, сайтуудаар өргөн сурталчилж Японы олон нийтэд хүргэсэн юм.
Мөн арга хэмжээнд Хоккайдо мужийн дэд дарга, Япон дахь Монгол Улсын ЭСЯ - ы эдийн засгийн зөвлөх Э. Сарантөгс, Японы барилгын ассоциацийн үе үеийн удирдлагууд болон хувийн хэвшлийн олон төлөөлөгчид оролцлоо.
Манай хамтын ажиллагааны эхний алхам болгож монгол барилгын инженерүүдийг Японд туршлага судлуулах, бодит байдалтай танилцуулах зорилгоор энэ өвөлдөө багтаан явуулах юм байна.