Хотын төвийн аль өнгөтэй, байрлал сайтай газрыг хууль бусаар эзэмшилдээ оруулсан, эзэн нь мэдэгдэхгүй, зориулалт нь тодорхойгүй газруудыг төр мэдэлдээ буцаан авах шийдвэр гаргажээ. Сургууль, цэцэрлэг, эмнэлгийн талбайгаас хумсалсан, инженерийн шугам сүлжээ, ундны усны эх үүсвэрийн дотоод мужид хамаарах, мөн хоёроос дээш жилийн хугацаанд эзэмшил газраа ашиглаагүй гэх үндэслэлээр нийт 40 газрын эзэмших эрхийг цуцлахаар болсноо нийслэлийн удирдлагууд мэдэгдээд байна.

    NEWS.mn сайт “Эзэнгүй хашааны эзэн олдлоо” цуврал сурвалжлага бэлтгэн хүргэж байсныг уншигч та санаж буй биз ээ. Бидний хөндөж, эзнийг нь эрэн сурвалжилсан хашаанууд ч энэ шийдвэрт хамаарч, улсын өмчид үлдэх болсныг онцолж байна.
 

   Хэн, хэзээ, ямар байдлаар эзэмшилдээ оруулсан болох нь тодорхойгүй, хувь хүн, хэн нэг этгээдийн хувийн эзэмшлийнх гэхэд итгэмээргүй газрууд ч дээрх жагсаалтад багтсан байгаа юм. Тухайлбал, СБД-ийн III хороо, хуучнаар “Хангай” зочид буудлын хойд талд явган хүний зам бүхий хэсэг газар, Д.Нацагдоржийн нэрэмжит номын сангийн хажууханд, “Их Монгол” рестораны өмнөх авто зогсоол, Төв шуудангийн зам урд орших явган хүний зам дагуу хэсэг газар, “Саппоро” үйлчилгээний төвийн урд талбай, СХД-ийн 17-р хороо, 32-р байрны хажууд орших хүүхдийн тоглоомын талбай, Төв шуудангийн чанх баруун талд орших “эзэнгүй хашаа” зэргийг нэрлэж болно. /Нийслэлийн аль хэсэгт, хаана байрлах газрын зөвшөөрлийг цуцалсан эсэхийг дараах зургаас харна уу/
 

    Жагсаалтад багтсан 40 газрын хоёрт нь хэдийнэ байшин, барилга сүндэрлээд эхэлжээ. Тодруулбал, ундны усны эх үүсвэрт баригдсан “Дүнжингарав” худалдааны төв, мөн “Буянт цэцэрлэг” компанийн газарт баригдсан үл хөдлөх хөрөнгийн асуудлыг Үндсэн хуульд заасны дагуу тухайн иргэн, байгууллага шүүхэд гомдол гарган, шийдвэрлүүлэх боломжтой аж. Ямартай ч тухайн газрыг эзэмших эрх олгосон захирамжийг хүчингүй болгосон тул чөлөөлөх л учиртай.
 

   “Цаашид ч зөвшөөрөлгүй газарт баригдсан барилгуудыг нураах нь зүйтэй. Заагдсан хэмжээнээс нэг метр ч илүү гаргаж, барилга барьсан бол буулгаж л таарна. Хууль бусаар олгосон газрыг цуцлахаас гадна олголт хийх үе шатыг олон нийтэд нээлттэй байх зарчмыг хэрэгжүүлэх төрийн үйл ажиллагаанд шилжинэ” гэдгийг хотын дарга Э.Бат-Үүл онцолсон байсан. Мөн зөвшөөрөлгүй газарт зөвшөөрөлгүй барилга барьсан нь тогтоогдвол Эрүүгийн хуулийн дагуу хариуцлага хүлээлгэнэ гэдгийг ч Улсын дээд шүүх болоод Нийслэлийн прокурорын газрын удирдлагууд мэдэгдэж байсан юм.
 

    Ямартай ч нийслэл хотын чухал асуудал, үргэлжид хөндөх сэдвийн нэг байдаг зөвшөөрөлгүй барилга, газар олголт, түүний уршгаар хотын энд тэнд сарайх эзэнгүй хашааны асуудал ийнхүү шийдэгдэж эхэллээ.
 

  Д.ЖАРГАЛСҮРЭН