Барилгын салбарын­хан Төрийн ор­донд “Барил­гын салбарын хөдөлмө­рийн аюулгүй байдал, эрүүл ахуйн хяналтын тог­толцооны шинэчлэлт” сэ­дэвт үндэсний зөвлө­гөөнөө хийлээ.

      Зөвлөгөөнд Барилга Хот байгуулалтын сайд Ц.Баярсайхан, БХБЯ-ны Төрийн нарийн бичгийн дарга Р.Эрдэнэбүрэн, “ХАБЭА-н Гурван талт үндэсний хороо”-ны дарга, Хөдөлмөрийн яамны нарийн бичгийн дарга Б.Ганцэцэг болон барилгын салбарт үйл ажиллагаа явуулдаг компаниудын төлөөлөл оролцлоо.

Үндэсний зөвлөгөөний эхэнд БХБ-ийн сайд салбарын хэмжээнд авч хэрэгжүүлж байгаа ажлын тухай болон барилгын талбай дээр гарч байгаа осол аваарыг бууруулахад зориулан “цэнхэр карт” хөтөлбөрийг хэрэгжүүлэх тухай дуулгалаа. Энэхүү картыг компаниудын өдөр тутмын үйл ажиллагаанд нэвтрүүлсэнээр осол эндэгдэл буурах боломжтой гэж үзэж байгаа юм байна. Мөн барилгын компаниудыг нэгдсэн байдлаар даатгалд хамруулах талаар “Монгол даатгал” ХХК-тай ярилцаж байгааг сайд онцоллоо.

 

      “ХАБЭА-н гурван талт үндэсний хороо”-ны гишүүн, МБХ-ын ерөнхийлөгч М.Батбаатар “Барилгын салбарын ХАБЭА-н удирдлага, хяналтын тогтолцоог юунаас эхлэн шинэчлэх вэ” гэсэн илтгэлийг тавьлаа.

Илтгэлийн гол агууллага нь барилгын салбарт ХАБЭА-н удирдлага хяналтын тогтолцоог цоо шинээр бүрдүүлэх хэрэгтэйг онцолж байлаа. Мөн салбарынхан барьж байгаа барилга болон бариулж байгаа ажилчдынхаа эрүүл мэндийг даатгуулдаг тогтолцоонд шилжих шаардлага тулгараад буйг дурьдлаа. Ингэхийн тулд эрх зүйн орчныг бүрдүүлэх нь хамгаас чухал байгаа юм. Үндэсний зөвлөлгөөний үеэр тогтолцоог шинэчлэх цаг нь ирсэн гэдгийг барилгын салбарынхан санал нэгтэй дэмжиж байсан юм. Мөн Барилга, хот байгуулалтын яамны Барилгын үйлдвэрлэлийн хөдөлмөр хамгаалал, аюулгүй ажиллагаа хариуцсан мэргэжилтэн Б.Батхишиг “Үндэсний дөрөв дэх хөтөлбөрийн хүрээнд хөдөлмөрийн аюулгүй байдлын салбар хороог байгуулчихсан. Энэ хүрээнд цэнхэр карт хөтөлбөрийг хэрэгжүүлнэ. Уг хөтөлбөр  нь  барилгын үйлд­вэрлэлийн талбайд орох эрхийг нээж өгөх юм. Ажилчид барилгын талбайд орохын тулд цэнхэр картыг авна. Энэ нь аюулгүй ажиллагааны зааварчилгаа авсан байгаа гэсэн үг юм” хэмээлээ.

 

     Уулзалтаар анзаарагдсан бас нэг зүйл нь хуралд ирсэн компаниудын төлөөлөлд тараагдаж байсан материал нь яамны зүгээс хэрэгжүүлж байгаа арга хэмжээний мэдээллийг хүргэх гэхээсээ илүүтэйгээр нэг сургалтын төвийн мэдээлэл болон үйл ажиллагааг сурталчилсан мэт санагдаж байлаа. Цаашдаа энэ төрлийн сургалт зохион байгуулахад анхаарах асуудлын нэг байж болох юм. Уулзалтаас гарсан дүгнэлт ажил хэрэг болсон эсэхийг бид эргэн мэдээлэх болно.