Хятадын Хунан мужийн Чанша хотноо дэлхийн хамгийн өндөрт тооцогдох Скай Сити цамхагийг барих гэж байна. Одоогоор дэлхийн хамгийн өндөр барилгад Арабын Нэгдсэн Эмират улсын Бурж Халифа цамхаг тооцогддог.

  Скай Ситиг ердөө 90 хоногт буюу 3 сарын хугацаанд барина хэмээн Хятадын барилгын БиЭсБи компани өнгөрөгч зургадугаар сард амлаж, дэлхий нийтийн анхаарлын төвд орсон билээ. Гэсэн ч засгийн газраас барилгын зөвшөөрлийг аравдугаар сард авсан бөгөөд арваннэгдүгээр сард ажлаа эхлэж 210 өдрийн дотор барьж дуусгана хэмээн мэдэгдсэн. Гэтэл Брөүд группийн дэд ерөнхийлөгч Жулиэт Жиан арваннэгдүгээр сарын 16-нд өгсөн ярилцлагадаа одоо хүртэл засгийн газраас зөвшөөрөл аваагүй байгаа гэж хэлээд өдөрт бүтэн 5 давхрыг угсарч барьснаар 90 өдөрт барилгын каркасаа босгох боломжтой талаар хэлжээ.

  Мэргэжилтнүүд тус компанийн барилга барих хугацааг боломжгүй хэмээн эргэлзэж байгаа. Учир нь барилгын даац, бүтэц, барих арга нь нийтэд тодорхой бус байгаагаас аюулгүй байдалд нь эргэлзэж буйгаа хэлсэн. Барилгын зураг төслийг удахгүй орон нутгийн удирдлагууд нь батлах бөгөөд арванхоёрдугаар сарын сүүлээр ажлаа эхлэнэ гэж мэдэгдээд байгаа ч хугацаа нь дахин хойшлож магадгүй байгаа билээ.

  Оттавагийн их сургуулийн профессор Пьер Бюдэт “Хятадуудад чадахгүй зүйл байхгүй шүү дээ. Энэ барилгыг барьснаар тэд Хятадыг ямар том гүрэн болохыг дэлхий дахинд харуулахыг зорьж байгаа хэрэг. 1931 онд Нью-Йорк хотноо Эмпайр Стэйт Буилдингийг барьсны дараа Америк улс дэлхий дахинд өөрийгөө хэн болохыг харуулж чадсан” гэж ярьжээ.

  Скай Ситиг барих БиЭсБи компани өмнө нь 15 давхар зочид буудлын барилгыг 48 цагт, 30 давхар барилгыг 15 өдөр барьж байсан туршлагатай юм байна.