Өнөөдөр  Хангарьд ордонд “Аюулгүй Улаанбаатар” сэдэвт зөвлөгөөн болж өнгөрлөө. Тус зөвлөгөөний зорилго нь хот байгуулалтын талаар цаашид авах арга хэмжээ, барилга байгууламжийн угсралтын ажил, машин механизм, тоног төхөөрөмж өргөх байгууламжийн хөдөлмөр хамгаалал аюулгүй ажиллагааны арга технологийн талаар хамтран ажиллах санал солилцох зорилготой юм. 

Зөвлөгөөнд нийслэлийн засаг дарга бөгөөд Улаанбаатар хотын захирагч Э.Бат-Үүл, Барилга хот байгуулалтын сайд Ц.Баярсайхан зэрэг  нэр бүхий албаны хүмүүс оролцож, барилгын салбарын мэргэжилтнүүд тулгамдаж байгаа асуудал цаашид авах арга хэмжээний талаар илтгэл тавьж санаа бодлоо солилцлоо.

Нийслэлийн Засаг даргын Тамгын газар, Барилга, хот байгуулалт, төлөвлөлтийн газар хамтран зохион байгуулсан тус арга хэмжээнд  барилгын талын тулгамдсан асуудлыг илүүтэй хөндлөө.
Мөн хот байгуулалтад оролцож байгаа төрийн болон төрийн бус байгууллагуудын чадварыг сайжруулах, хариуцлагыг өндөржүүлэх, оршин суугчдын оролцоог нэмэгдүүлэх ажлыг зохион байгуулах, барилгын захиалагч болон ерөнхий гүйцэтгэгчид нь барилга угсралтын ажлыг барилгын барилгын тусгай зөвшөөрөлгүй, мэргэжлийн бус, хэсэг бүлэг хүмүүсийн байгуулсан бригадын ахлагч болох хувь иргэдтэй ажил гүйцэтгэх гэрээ байгуулан ажиллуулдаг явдлыг таслан зогсоох, барилга байгууламжийн техникийн болон ажлын зураг төсөл батлагдаагүй, ажил эхлэх, үргэлжлүүлэх зөвшөөрөл олгогдоогүй байхад барилгын ажлыг эхлүүлэхгүй байх,  “Барилгын тухай хууль”-ийн 6 дугаар бүлгийн 25.1, 25.2 дугаар заалтыг баримтлан  ажиллах, Барилгын өргөх байгууламжийг техникийн паспорт, дүрэм, стандартад заасан нөхцлөөр ашиглах, холбогдох мэргэжлийн  хяналтын байгууллагад хянуулж батлуулах, 2013 онд бүх өргөх байгууламжийг паспортжуулах ажлыг хийж дуусгах гэх мэт олон зүйлийн талаар хэлэлцсэн юм.