БХБ-ын сайд Ц.Баярсайхан өнгөрсөн амралтын өдөр барилгын салбарт үйл ажиллагаа явуулж байгаа төрийн бус байгууллагуудыг хүлээн авч уулзаж, тулгамдаж байгаа асуудлуудыг нь сонслоо.

     Энэхүү уулзалтанд Зураг төслийн холбоо болон Монголын бараа материал үйлдвэрлэгчдийн холбоо болон энэ чиглэлийн үйл ажиллагаа явуулдаг аж ахуйн нэгж, компаниудын төлөөлөл оролцсон юм.

 

      БХБ-ын сайд эхлээд ЗТЗХ-ны төлөөллийг хүлээн авч хүлээн авч уулзсан юм. Барилгын салбарт зураг төсөл хийх тусгай зөвшөөрөлтэй 400-аад компани байдаг ба үүн дээр эрчим хүч, уул уурхайн зураг төслийн байгууллагууд нэмэгддэг юм байна. Төрийн бус байгууллагууд болон компаниудын төлөөлөл сайдаар нэн тэргүүнд шийдвэрлүүлэх асуудал нь нөгөө л хүнд суртал, олон шат дамжлага, гарын үсэг, хууль эрх зүйн орчноо яаралтай сайжруулж өгөхийг хүсч байсан юм.

 

     Өмнөх сайдын үед энэ асуудлуудаа ярьж л байсан, гомдлын мөр гэгчээр ахиад л яриад сууж байна. Зураг төслийн байгууллагуудад тулгардаг хамгийн хүндрэлтэй асуудал нь магадлалын асуудал байдаг гэнэ. Нэг зураг төсөл гаргахад 6-8 хүн оролцдог. Харин гарсан зураг төсөл агентлагт очоод ахиад 6-8 хүн үзнэ. Ингэж олон хүний гар дамжсан зураг төслийн магадлал гаргахад наанадаж 6 сар цаанадаж жил болдог. Мөн хууль дүрэм нь зөрчилтэй. Тиймээс магадлалыг нэг цэгийн үйлчилгээнд шилжүүлвэл цаг хугацаа хэмнэх үр дүнтэй арга болохыг сайдад уламжлалаа. Энэ байдлыг арилгах талаар өмнөх сайд болон агентлагт санал бичиг хүргүүлсэн ч ямар нэг хариу өгөөгүй гэдгээ учирлаж байсан юм.

 

     Барилгын салбарын хөгжил, чанар чансаатай барилга байгууламж баригдахад материал бүтээгдэхүүн чухал. МУ-ын хэмжээнд 500 гаруй барилгын материалын үйлдвэрүүд байдаг. Барилгын материал бүтээгдэхүүн үйлдвэрлэгчдэд дарамт, хүндрэл учруулдаг нэг зүйл нь нөөцөнд байгаа газраас татвар авдаг. Мөн барилгын материал бүтээгдэхүүний үйлдвэрийг улиралын нөлөөллөөс гаргах хэрэгтэй. Учир нь хавар барилга эхэлсэнээс хойш 2 сарын дараа материалын үйлдвэр эхэлдэг. Барилгаа зосгоохгүй тулд урд хөршөөсөө материалаа зөөдөг. “Нэмэр дээр нэрмээс” гэгчээр төмөр замынхан ямар нэг мэдэгдэлгүйгээр тээвэрлэлтийн зардлаа нэмдэг. Тийм учраас дотооддоо материал бүтээгдэхүүн үйлдвэрлэх боломжийг олгох хэрэгтэй байгааг сайддаа дуулгалаа. Монголд материалын үйлдвэр хөгжихгүй байгаа нь эргэлтийн хөрөнгө байхгүйтай холбоотой. Банкнаас зээл авах гэхлээр хэтэрхий өндөр хүүтэй.