Өвөлжилтийн бэлтгэл  хэдэн хувьтай явж байгаа талаар  саяхан эрчим хүчний яам дээр албаны хүмүүсийн хурал болсон. Тус өргөтгөсөн шуурхай хуралдаанаар салбарын үйлдвэр, компаниудын удирдлагууд ажлаа танилцуулж, өвөлжилтийн бэлтгэл улсын хэмжээнд 80 хувьтай явж байна хэмээн  мэдээлсэн.  Энэ сарын 15-наас эхлэн дулаанаа өгч өвлийн горимдоо шилжсэн юм.  Ачааллын хувьд өнгөрсөн жилийнхээс нэмэгдэж байгааг Диспетчерийн үндэсний төвийн дарга танилцуулж байлаа.

Сайд М.Сономпил тулгамдсан асуудлыг яаралтай шийдвэрлэж,  өвлийн бэлтгэл ажлыг 11  дүгээр сараас өмнө дуусгахаар хугацаа зааж өгсөн төдийгүй нүүрсний аюулгүйн нөөцийг бүрдүүлж, энэ сард  20-оос доошгүй хоногийн нөөцтэй болгохыг сануулаад,

Мөн 2012 онд улсын төсвийн хөрөнгө оруулалтаар хэрэгжүүлж байгаа төсөл арга хэмжээнүүдэд техникийн хяналт тавих, ялангуяа дулаан, цахилгааны шугам сүлжээний өргөтгөл, шинэчлэлтийн ажлуудыг өвлийн их ачаалал эхлэхээс өмнө ашиглалтанд оруулах арга хэмжээг авах,

 Халаалтын улиралд ахуйн хэрэглээнд хэрэглэх цахилгааны ачааллаас шалтгаалан үүсэх хэт ачааллыг одооноос тооцоолон авах арга хэмжээг төлөвлөн хэрэгжүүлэх,

Нийслэлийн агаарын бохирдлыг бууруулах ажлын хүрээнд компани бүр өөрийн өөрийн хүлээсэн үүргээ бүрэн биелүүлэх, “Нийслэлийн агаарын чанарыг сайжруулах бүсийн гэр хорооллын айл өрхөд олгох цахилгааны үнийн урамшуулал олгох” журмыг хэрэгжүүлэхтэй холбогдон үүсч байгаа хариуцлагыг сайжруулах, хэрэглэгчдэд түргэн шуурхай чирэгдэлгүй үйлчлэх

Орон нутгийн дулааны станцуудын өвлийн бэлтгэлийг шалгах, ялангуяа Увс, Ховд, Дорноговь аймгуудын дулааны станцуудын өвлийн бэлтгэлийг сайтар хангуулахад онцгой анхаарах, Дорноговь аймгийн засаг даргаас одоо хөрөнгө мөнгө шийдүүлэхээр ирүүлж байгаа хариуцлагагүй албан тоотуудыг сайтар судлан үндэслэлтэй, тодорхой хариу өгөх, өвлийн бэлтгэлийг хангуулах талаар анхаарч ажиллах,

Уурхайнуудын өвлийн бэлтгэлийг мөн анхаарах, эрчим хүчний бэлэн нүүрсний хэмжээг байвал зохих хэмжээнд нь бэлэн байлгах, арга хэмжээг авах зэргийг үүрэг болголоо.

Тэрбээр нэгэн ярилцлагадаа : Өнөөдрийн байдлаар Монгол Улс эрчим хүчнийхээ зургаан хувийг ОХУ, 1,5 хувийг Хятад улсаас авдаг импортлогч орон. Тэгэхээр эрчим хүчний хэрэглээ ихээхэн дутагдалтай гэсэн үг. Цаашид ч эрэлт, хэрэгцээ жилээс жилд өсөн нэмэгдэж байна. Ирэх жилээс цахилгааны гачаалд ороод эхэлнэ. Өөрөөр хэлбэл, импорт нэмэгдээд явна гэсэн үг. Тиймээс шинэчлэлийн бодлогын хүрээнд хэд хэдэн томоохон зорилт тавьж байна. Сүүлийн арваад жил эрчим хүчний шинэ эх үүсвэр V цахилгаан станцын тухай их ярьсан. Техник, эдийн засгийн үндэслэл ч нэлээд хийгдсэн. Олон газар тухайлбал, Налайх, Говьсүмбэр, Багануур, Хонхорт барих тухай ярьж ирсэн. Ингээд III цахилгаан станцыг өргөтгөсөн. 450 мегаватын хүчин чадалтай V цахилгаан станцыг барихаар хавар тендер нь зарлагдсан ч техникийн болон экологийн хүндрэлтэй асуудал олон бий. Эдгээрийг анхаарч ажиллана гэж хэлжээ.