Нэг л юм болохгүй байна...

Энд нэг л юм болохгүй байна, нэг л юм болохгүй байна, нэг л юм, нэг л юм..... гэж битүүлэг утгатай  “Хадаг”  кинон дээр гол дүрийн жүжигчин нь бухимдлынхаа дээд цэгт хүрч,  хоолойгоо сөөтөл орилдог хэсэг  санаанд орчихлоо.

Үнэхээр барилгын салбарт нэг л юм болохгүй байна. Харин юу гэдгийг нь мэдэхгүй юм.
Хүнээр бол хийморийн сан тавиулж, ламд үзүүлэн, зам мөрөө даатгамаар юм шиг. Өнгөрсөн наймдугаар сараас авхуулаад шил дараалсан олон асуудал барилгын салбарт өрнөлөө. Барилга барих зөвшөөрөл олгохгүй байх өдрөөс авхуулаад өнөөдрийг хүртэл юу болов гэдгийг бодоод үзээрэй.  Энд нэг л юм болохгүй байна гэж та өөрийн эрхгүй бодно.

Өчигдөр 17:00 цагийн орчим “Тэнгис” кино театрын урд талд баригдаж буй барилгын дээрээс том хэмжээний төмөр унаж, 20 гаран настай залуу толгойдоо хүнд бэртэл авч нас барчээ.
Тус барилгыг "Эко констракшн" компани бариулж байгаа ажээ.
 Барилгын салбарт дуу дуугаа авалцан ямар үйл явдал болоод байгааг, 10 гаруйхан хоногт хэдэн хүн барилгаас болж хорвоог орхисныг та надаар хэлүүлэлтгүй мэдэж байгаа.

Бүхий л ертөнцийг 100хувь гэж үзвэл 30 хувь нь бодит үлдсэн 70 хувь нь хийсвэр ертөнц гэж нэгэн эрдэмтэн хэлсэн байдаг. Далд ертөнцөд барилгынхныг юу удирдаад байна вэ?
Уншигч та намайг яасан сүржин юм гэж бодож магад. Гэвч ингэж ухаж бодохоос өөр арга алга. Урд нь барилгаас болж ийм олон хүн нас барж байсныг би санахгүй байна, барьж буй барилгыг хажуугаар гарахдаа бөмбөг дэлбэрэх гэж байгаа юм шиг, эсвэл буу барьсан алуурчин хэзээ мөдгүй буудах гэж байгаа юм шиг айдастай, түгшүүртэй  алхаж байснаа санахгүй юм.  Шог зургаар үзүүлвэл барилга өөрөө үхлийн илч, эсвэл цуврал алуучин шиг харагддаг болж.  Хүмүүс барилгыг ийм нүдээр харж байна.

Тэргүүлэх салбарт тооцогддог барилгын салбар сар гаруйхан хугацаанд яагаад ингэтлээ доошилж нэр хүнд шороотой хутгалдана вэ?
Тиймээ. Энд нэг л юм болохгүй байна.

“Төрийн минь сүлд өршөө” гэж эмээгийн үеийн эмэгтэйчүүд өглөө болгон цай сүүгээ өргөдөг байж. Төрөө бурхан шиг дээдэлдэг байж. Харин одоо төрдөө залбирах нь битгий хэл дуртай нэг нь төрөө нулимж, муулж байгаа болохоор төр нь төр биш болж, дээрээ суудлаа олохоо больсон гэж эмээ маань хэлж байсан шиг.
Барилгын салбарыг муулах тусам, үзэн ядах тусам, муу энерги салахгүй байна уу даа ч гэж бодох шиг.  Нар жаргаад маргааш дахиад манддаг шиг. Сайхан цаг ирэх байлгүй дээ.