Өчигдөр Мэргэжлийн хяналтын газраас сэтгүүлчидэд мэдээлэл хийлээ. Ойрын үед олны анхаарлын төвд байгаа барилгын салбарын асуудлаар ярилцсан тус мэдээллийн үйл явц сэтүүлч, албаны хүмүүсийн  мэтгэлцээн дунд өнгөрсөн гэхэд хэлсдэхгүй. Мэргэжлийн хяналтын дарга огцроод удаагүй ч түр орлогч томилсон байлаа.  

Эрсдэлтэй гэгддэг барилгын салбарт тавигдах хяналт шалгалт сулраагүй харин ч сайн явагдаж байгаа. Бид мэдэгдэл хүргүүлж, шаардлага л тавих үүрэгтэй.  Зөрчил илрэх гол шалтгаан нь барилгын зураг төсөл, угсралтын үйл ажиллагаа явуулж байгаа аж ахуйн нэгжүүдээс шалтгаалдаг. Бид шалгаад шаардлага хүргүүлдэг ч түүнийг биелүүлдэг байгууллага тун ховор. Долоон давхар барилга барихад 20 гаруй мэргэжлийн хүн ажиллах ёстой байтал 10 гаруйхан цалин багатай, сайн дурынхныг ажиллуулж, эрсдэлд хүргэдэг. Энэ нь  мөнгө хэмнэх гэсэн удирдлагын буруу гэж дүгнэж байгаа. Тэрнээс хууль дүрмээ дагаад бидний шаардлагыг биелүүлвэл ийм асуудал үүсэхгүй. Мэргэжлийн инженерүүд, мэргэжлийн кранист, мэргэжлийн дохиочинтой байж үүрэг хариуцлагаа бүрэн ухамсарлаж, өнөөдрөө биш маргаашийг харж амьдрах хэрэгтэй гэсэн тайлбарыг албаныхан өглөө. 

Албаныхнаас зарим асуултанд хариулт авсанаа хүргье.

-Есөн сар гараад дөрвөн иргэн барилгаас болж нас барлаа. Мөн зөвшөөрөлгүй 80 гаруй барилгын хаагуур нь явж байсан юм бэ, мэргэжлийн хяналтыг ажлаа хийхгүй байна гэсэн дүгнэлтийг Нийслэлийн засаг дарга төдийгүй, иргэд хэлж байна. Энэ тал дээр юу гэж хэлэх  вэ?

-Бид хичээгээд л ажиллаж байна. Зөвшөөрөлгүй барилгын хувьд бид газар олгох шийдвэрийг гаргадаггүй. Тэрнийг засаг даргын захирамжаар шийддэг асуудал. Жишээ нь: Тэнгисийн тэнд дэхь барилгыг 2011 онд засаг дарга н.Мөнхбаяр байхдаа олгосон газар. Гэсэн ч  хорь хүрэхгүй байцаагч энэ олон барилгыг өдөр шөнөгүй хянаж чадахгүй байна.

-Тэнгисийн  урд байрлах барилгаас төмөр унаж 20 гаруйхан настай залуугийн амийг авч одлоо. Энэ тал дээр Мэргэжлийн хяналтаас ямар арга хэмжээ авсан вэ?

- Энэ нь К.Пүрэвийн нэр дээр байдаг барилга. Бид зохих ёсны арга хэмжээг авч 250 мянгаар торгосон. Одоо хуулийн байгууллагын л ажил үлдсэн.

- Зөвшөөрөлгүй барилгуудыг одоо яах вэ?

-Аюултай бөгөөд ноцтой нь тогтоогдвол барилгын ажлыг зогсооно.  Мөн тогийг нь таслах арга хэмжээ авна.

Энэ мэт хариулт нь сэтгүүлчдийг цочоолоо. Бүхэл бүтэн хүнийг амийг 250 мянгаар үнэлсэн нь хачирхалтай. Хоёр сая гаруйхан хүнтэй байж нэгнийхээ алтан амийг хэн нэгний өдрийн хоолны мөнгөнөөс дор үнэлж байгаа нь хэнд ч таалагдахгүй нь мэдээж. Нийслэлийн засаг дарга энэ бүх үйл явцад мэргэжлийн хяналтын газрыг буруутгаж байгаа бол Мэргэжлийн хяналтынхан  газар олгодог эрх бүхий хүмүүсийг буруутгаж дүүжин дайжиндаж байна. Хэний буруу болох нь хэзээ нэгэн цагт мэдэгдэх байлгүй дээ.
                                                                                                                    

                                                                                                                              Л.Мөнхчимэг