Гаднаа ч, дотроо ч паланцаг болсон  нийслэлийг “гяланцаг” болгохоор эрхмүүд толгойгоо гашилгаж байгаа юм байх. Ингэхийн тулд ихэнх шийдвэрийг иргэдийн санал санаачилгад тулгуурлан хэрэгжүүлж байгаа гэж  албаныхан хэлсэн. Иргэд ч элдэв бусын санал санаачилга дэвшүүлж, нийслэл хотоо сайн сайхан болгоход гар бие оролцож, олон арван захидлыг албаны хүмүүст илгээж байгаа аж.

Эдгээр санал дотор “Нийслэлийг  нэг л  аргаар хөгжүүлнэ” гэсэн нэгэн сонин гаргалгаа байх юм гэнэ.
Тэр нь гишүүдээс ч  өндөр цалинг тохижилт  үйлчилгээний ажилтнуудад өгөх гэсэн  санаачилга гэнэ. 
Халуунд халж, хүйтэнд хөрч, үүрийн дөрвөн цагаас үдшийн бүрий болтол ажиллах эдгээр хүмүүст өндөр цалин өгч ажиллуулах нь юу нь болохгүй байхав.  Хангамж нь сайн байх тусам бүтээмж нь сайжирах нь хууль.  Энэ жишээгээр олон улс орон хөгжлийн түвшинд хүрсэн.

Жишээ нь:  Сингапурт тохижилт үйлчилгээний ажилтны  авч буй цалинг гүйцэх цалинтай хүн ховор гэнэ. Цэвэрлэгч, цагдаа хоёроор элбэг энэ орон эрүүл, аюулгүй орчинг жинхэнэ ёсоор нь  бүрдүүлж чадсанаараа  дэлхийн улс орнуудад үлгэр жишээ болдог юм.

Гэтэл манайд  цагдаа нар нь хүрэлцээ муутайгаас илүү цагаар ачаалал ихтэй ажиллаж байгаад ухаан алдан унах тохиолдол наад талын жишээ гэнэ.
Саяхан нэгэн цагдаа арван хоёр хоног босоогоороо ажиллаж байгаад зам дээр ухаан алдан унажээ. Хэдийгээр ажилгүйчүүд, хөгшин настай хүмүүст  тодорхой хэмжээний мэдлэг олгоод өдрийн 10000 төгрөгөөр ажиллуулж,  мөн  цагдаагийн сургуулийн оюутнууд болон төгсөгчдийг нэмэлт хүчээр авч ажиллуулж байгаа ч эдгээр нь хүрэлцэхгүй байгаа нь дээрх жишээнээс харагдаж байгаа юм.

 
Гэвч цагдаа нар ачаалалтай ажилсан ч  өнөө л авдаг хэдээ л авч байгаа гэнэ.  Тохижилт үйлчилгээний ажилтан, цагдаа нарын асуудал дээр бага зэрэг анхаарлаа хандуулаад өгвөл өөдлөх айл үүднээсээ гэдэг шиг хот минь өнгө зүстэй болж элдэв гэмт хэрэг муу бүхнээс хол байх болов уу гэж бодох юм. Тэгэхгүй бол хог новш нь арай л дэндлээ.5 саырн 1-нээс  эхэлсэн зам засварын ажил одоо болтол дуусаагүй зам хаасаар байна. Энд тэндгүй л ухсан нүх овоолсон шороо болж. Өчигдөр би нэгэн эрхмийг  үхлийн ирмэг дээр байж байхыг  нүдээрээ харлаа. Шөний арван 11:00  цаг өнгөрч байхад замын хажуугийн нүхийг харахгүй нэгэн эрхэм биеийн жингээр доошоо унаж, зөвхөн хоёр гар дээрээ тулан үлдэж туслаарай гэж хашгирч байлаа.

Харахад нөлөө бүхий тэр эрхэм согтуу ч биш, солиотой ч биш гэдэг нь илт байлаа. Би найзтайгаа очин татаж гаргахад хөл гар нь нил өвчин болж шалбарсан байлаа. Зүгээр л такси барих гэж зогсож байгаад л нүхрүү унасан гэнэ. Ийм үйл явдал бараг л алхам дутам тохиолдож амьд явах баталгааг минь улам л бүрхэг болгож байна.