Хаа сайгүй газрын наймаа явагдаж, зөвшөөрөлгүй барилга баригдаж байгаагийн балаг дуусахгүй байхаар үл барам бяцхан охины амь насанд хүртэл хүрсэн билээ.

Эцэстээ хүний амь насанд хүрч байж албан тушаалтнуудын сонорт хүрсэн энэ хэргийн хариуд дээрх шийдвэрийг гаргажээ.

Өдгөө Улаанбаатар хотод барилга барих эсвэл газар эзэмших зөвшөөрөлгүй эхэлсэн 60 гаруй байгууламж байдаг байна. Тиймээс хотын удирдлага тэдгээр барилгын ажлыг өнөөдрөөс эхлэн бүрмөсөн зогсоох шийдвэрийг Нийслэлийн Мэргэжлийн хяналтын газар болон Нийслэлийн Цагдаагийн газарт үүрэгджээ.

Мөн зөвшөөрөлгүй баригдаж байгаа болон баригдсан барилгуудыг цахилгаан дулаан, цэвэр усаар хангахгүй байхыг хангагч байгууллагуудад үүрэг болгон өгөхөөр шийдвэрлэсэн байна.

Барилгын ажил хийж байгаа компаниуд болон хувь хүмүүсийн эзэмшилд ашиглагдаж байгаа бүх машин механизмуудад энэ есдүгээр сард багтаан үзлэг хийж гэрчилгээжүүлэх ажлыг хийж дуусгахыг НМХГ-т үүрэг болгожээ.

Охины амь насанд халдсан “Тоёхиро Студио” хэмээх компани барилгын явцыг өнөөдөр мөн зогсоосон байна.

М.Жаргал /gogo.mn/