АНУ-ын ерөнхийлөгч Дональд Трампын тарифын нөлөөгөөр АНУ-д орон сууцны барилгын өртөг 9200 ам.доллароор өсөж магадгүй гэж “NAHB” байгууллагын судалгаанд онцолсон байна. Тарифаас шалтгаалан импортын түүхий эд, бараа материалын үнэ өсөж, дагаад барилгын ажлын зардал ийнхүү нэмэгдэж болзошгүй байгаа аж. Ингэснээр барилгын компаниуд үнээ нэмэх, эсвэл ашгийн маржинаа бууруулах гэсэн сонголттой тулгарна.

АНУ дахь барилгын компаниуд аль хэдийн ашгийн маржин тааруу байгаа тул үнээ өсгөх өндөр магадлалтай гэдгийг судалгаанд дурджээ. Гуравдугаар сарын байдлаар АНУ-ын хэмжээнд шинээр баригдсан нэг өрхийн орон сууцны дундаж үнэ 414 мянга ам.доллар байна.

Хэдийгээр АНУ-ын үл хөдлөх хөрөнгийн зах зээлд хуучин орон сууц давамгайлдаг ч шинэ орон сууцны эзлэх хувь муж мужид өөр байна. Тухайлбал: Айдахо мужид борлуулагдаж буй нийт орон сууцуудын 40 хувь нь шинээр баригдсан байгаа нь хамгийн өндөрт тооцогдож байгаа юм. Үүний дараа хойд Каролина мужийн үл хөдлөх хөрөнгийн зах зээлийн 33 хувийг шинэ орон сууц эзэлж байна.